Mga barangay opisyal sa Talisay giseminar

MGA barangay opisyal sa dakbayan sa Talisay ilabi na kadtong chairman sa Barangay Disaster Risk Reduction ang Management Council gipailawom sa tulo ka adlaw nga seminar.

Si Vince Monterde, public information officer, ug mao usab ang pangulo sa Local Disaster Risk Reduction and Management Council miingon nga si Mayor Johnny delos Reyes maoy mipasiugda sa tulo ka adlaw nga seminar nga gipahigayon sa usa ka resort sa lungsod sa Cordova.

Matod ni Monterde nga ang seminar naglangkob sa pagtudlo sa mga opisyal sa 22 ka mga barangay sa Talisay kon unsay angayan nilang himuon aron malikay sa mga panghitabong katalagman.

Gibutyag ni Monterde nga aduna silay mga resource speaker nga gipangdapit usa na niini ang pangulo sa PAG-ASA, Oscar Tabada, sa Department of Social Welfare and Services, pangulo sa Provincial Disaster Risk Reducation and Management Council ug uban pa.

Si Mayor JVR miingon nga maayong ibutang gyud sa ilang tagsa-tagsa ka kasingkasing ug hunahuna ang ilang nakat-onan aron sa pagbalik sa ilang mga barangay mapaambit usab nila ang ilang makat-onan.

Ang chairman sa peace and order sa konseho nga si Konsehal Danny Caballero miingon nga maayo ang gihimo sa mayor tungod kay ang mga barangay mao may una gyud nga mo-respondi kon ang ilang barangay maigo sa trahedya ug katalagman.

Ang seminar gisugdan na niadto pang adlawng Martes ug mahuman kini karong adlaw.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph