Mga drayber baho'g ilok gireklamo

COMVAL PROVINCE -- Daghan na ang mireklamo sa giingon nilang way pag-areglar sa lawas sa mga trisikad drayber nga namasada sa lungsod sa Compostela.

Si Myna Panes, dalaga ug empleyado sa pribadong kompanya, mipadayag sa iyang kadismaya sa Superbalita labot sa iyang nasakyan nga trisikad drayber nga bahog ilok.

"Wa ko magtuo nga ingon diay ato kabaho ang ilok sa driver. Kanaugon na gyud ko apan wala man koy nakit-an nga laing masakyan mao nga nanap-ong nalang ko sa ilong, nagsigi pa gyud pabuhot sa sigarilyo,” sulti ni Panes.

Usa sab ka edaran nga babaye, kinsa gikan sa siyudad sa Tagum nga mibisita sa iyang anak sa lungsod, mipiyait usab tungod kay gawas nga baho kaayo, hubog pa gyud ang drayber.

"Alas 7:00 sa gabii dihang miabot ko sa St. James. Dayon gisugat ug gipasakay ko. Nagkanta-kanta siya unya baho kaayong tuba," sulti sa ginang.

Gireklamo usab sa ubang manakayay ang pipila ka mga trisikad driver nga kung maningil, ilabina kung gabii, halos doble ang singilon sa pasahero.

Usa ka mister ang nagreklamo sab tungod kay doble ang gipaplite kaniya.

Gitinguha sa mga residente nga mahatagan og aksyon ang maong mga reklamo sanglit maangin ang nagtinarong nga mga drayber.

Nanawagan sila sa lokal nga gobyerno nga dunay oryentasyon sa personal hygiene alang sa mga drayber. (Dexter T. Visitacion)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph