Mga kan-anan dunay gimik atol sa away nila Bradley ug Pacquiao

DIGOS CITY - Samtang nalingaw ang tibuok kalibutan pagsaksi sa idolong boksingero ug Kongresista Manny Pacquiao sa pag-depensa sa iyang titulo nga world welterweight batok Timothy Bradley, iya-iya sab og gimik ang mga fast food chain, restaurant ug karenderya sa Davao del Sur.

Gimik nila ang paghanyag og eat all you can sa ilang mga kustomer.

Kantidad P99 ang bayaran sa matag tawong mokaon sa eat all you can promo sa mga restaurants sa dakbayan aron lang makasaksi sa live streaming sa away.

Gikanayon ni Mayor Joseph Pe¤as nga nagbutang sila og wide screen sud sa city stadium aron libreng motan-aw ang mga Digose¤o sa boksing kagahapong adlawa.

Suportado sa mayor ang idolong boksingero ug kauban sa politika sanglit dinhi nanukad kaniadto sa iyang pagbansay si Pacquiao sa dakbayan.

Ang kapulisan ug militar aminado nga nitan-aw sab sa maong duwa sanglit malinawon ang lukop lalawigan.

Way natalang kawat sa mga motorsiklo aron madugang sa 58 ka ihap sa mga nahanaw nga motorsiklo sukad niadtong buwan sa Enero ug ning kasamtangang buwan.

Si Lieutenant Colonel Oliver Artuz, commander sa 39th Infantry Battalion, miuyon nga motan-aw ang kasundaluhan apan wa nila wad-a ang pagpaniid sa mga bukirang parte ilabi pa nga nasutang adunay presensya sa mga rebelde sa mga layong mga barangay sa Bansalan ug Matanao.

Subling naghiusa ang tropang gobyerno, walhong grupo ug mga dautang elemento aron lang mosaksi sa kulbahinam nga parte sa kasaysayan sa kinabuhi sa giila nga Pambansang Kamao. (Orlando B. Dinoy)

Related Stories

No stories found.
SunStar Publishing Inc.
www.sunstar.com.ph