PADAYONG misiaw ang mga kriminal sa lalawigan sa Davao del Sur bisan pa sa bahad nga naghinapos na ang ilang mga adlaw.
Isip pamatuod nga misiaw sila mao ang pagtulis sa usa ka kawani alas 6:30 sa gabii niadtong Martes.
Nagkapuliki ang Digos City Police Office aron ilhon ang mga suspek nga nanulis kang Amel Dante, 37, minyo, nagpuyo sa Barangay Catalunan Pequeño, siyudad sa Davao.
Ang biktima ahente sa DC Invest Inc. nga nahimutang kilid sa Jetti Gas Station didto sa Barangay Kiagot, siyudad sa Digos.
Padung na unta ang biktima sa tindahan sa iyang kustomer sakay sa iyang motorsiklo, apan kalit siyang giharang sa duha ka mga wa mailhing tawo nga nagsakay og kolor pula nga motorsiklo ug kolor blue nga pulos Honda XRM.
Usa sa mga naka-helmet nga tulisan ang nanion og mubo nga armas ngadto sa biktima dungan sa pagdeklara og tulis.
Ang biktima, kinsa nakuyawan niadtong higayona, wa makahimo pagsukol hinungdan nga gibira dayon sa mga suspek ang belt bag nga gisudlan sa iyang koleksyon.
Sumala sa biktima nga nadala sa mga tulisan ang salapi nga P15 mil, company reloader SIM pack nga adunay sud P3-mil load wallet ug naapil sab ang personal nga cellphone Nokia 6300 sa biktima nga kantidad P3-mil.
Gidaginot sab sa mga tulisan ang 80 ka mga bag-ong SIM packs, calculator, listahan sa kostumer ingon man ang yawe sa motorsiklo sa biktima.
Daling nanibat ang mga tulisan padung sa way tumong nga direksyon.
Nanaghap ang publiko nga didto sa dakbayan sa Davao nahadlok ang mga kriminal sanglit tinud-anay ang pagbantay sa kapulisan mao nga midagan karon sa Davao del Sur.
Sayo niini, nagbahad si Gobernador Claude Bautista nga nagkamubo na ang adlaw sa mga kriminal apan hangtud karon pabiling naghimo gihapon sa nagkadaiyang krimen sa lalawigan.