Mga mangingisda magtagbo

ILIGAN CITY -- Gikatakdang magtapok didto sa buhatan sa City Agriculturist ang mga mangingisda ning dakbayan sa Iligan, kauban ang mga representante sa Granex Manufacturing Corporation, Department of Environment and Natural Resources (DENR), Philippine Coast Guard (PCG), City Environment Management Office (CEMO) City Health Office (CHO) ug uban pa.

Matud pa ni City Agriculturist Octavios Molo, nga kini aron madunggan gikan mismo sa mga mangingisda ang ilang kahimtang sa panginabuhian human nga nakit-an ang mga oil spill o mga mantika nga anaa karon sa mga baybayon gikan sa mga nasunog nga bodega sa kopras sa Granex.

Gikumpirma ni Molo nga aduna nay mga reklamo nga miabot sa iyang buhatan gikan sa mga mangingisda, nga apektado na ang ilang panginabuhian tungod sa oil spill.

Hinoon mihimo na ang City Agriculturist Office og mga pagsusi sa mga dapit nga apektado sa oil spill, ug mohimo na usab sila og report niini ngadto sa ilang rehiyonal nga buhatan sa agrikultura alang sa tukmang aksiyon.

Samtang sa pikas nga bahin usab, sa pagsusi sa City Information Office didto sa Barangay Dalipuga, gikumpirma ni Jason Camingawan, sekretarya sa nasangpit nga barangay, nga wala pay nareport sa ilang buhatan nga adunay mga nangamatay nga isda o fish kill tungod sa oil spill.

Samtang namahayag si Deputy Commander Megardo De Guzman sa PCG-Iligan, nga kung makit-an nga adunay fish kill sa dapit human sa duha o tulo ka adlaw, posibleng makadaut usab sa tawo ang maong mga mantika o oil spill nga makit-an karon sa mga baybayon ning dakbayan sa Iligan. (Divina M. Suson)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph