MGA pasahero sa naaberyang barko nga mv Georich sa George and Peter (GP) Lines moduso og petisyon sa Maritime Industry Authority (Marina) ug Philippine Coast Guard nga did-an una kining makalarga og balik.
Kini tungod kay gikuwestiyon sa mga pasahero ang seaworthiness sa maong barko human ang insidente niadtong Sabado sa gabii mao nay ikatulong higayon nga naaberya ang maong barko sukad sa niaging tuig.
Si Neil Antiquena, usa sa mga pasahero, maoy nangulo sa petisyon kay matod niya di na angayng molawig pa ang maong barko kay din a masiguro ang kaluwas sa mga pasahero.
Ang nahisgutang barko nibiya sa pantalan sa Dapitan pasado alas 4 niadtong Sabado sa hapon apan mga alas 7 sa gabii napagngan og makina hinungdang kapin sa oras nga nag-utaw-utaw kini sa kadagatan sa may Apo island duol na sa Dumaguete.
Duna kini passenger capacity nga 526 apan duna ray kargang 327 ka mga pasahero paingon sa Cebu via Dumaguete.
Gipaabot unta kining moabot sa Sugbo mga alas 4 o alas 5 kagahapon sa kaadlawon.
Apan alas 2 sa kaadlawon na kining nakaabot sa Dumaguete human kini giguyod sa niaging mv Pilipinas Iloilo sa Cokaliong Shipping Lines.
Hinuon, gipakaon ang mga pasahero ug gikuha kini og pito ka mga Ceres bus gikan sa Dumaguete ug gihatod sa may South Bus Terminal sa siyudad sa Sugbo.
Apan matod sa usa sa pasahero nga na-interview sa dyAB nga di lalim ang ilang gibating nerbyos ug kakapoy sa taas na hinuon kaayong biyahe.
Hinuon nagpasalamat ang mga pasahero nga ma-ayo ra ang panahon maong wa ra usab sila mag-panic ug ang uban nangatulog ra samtang nagpaabot nga maluwas.
Apan, si Antiquena nisaway sa kapitan sa barko kay giingong 40 minutos pa ang nilabay gikan sa pagkapawong sa makina una sila gipahibawo sa insidente.
“After 40 minutes ayha pa mi gi-address sa captain. Di ko suhito sa navigation pero 40 minutes is a very long time nga nagpaabot ang mga pasahero kon unsay nahitabo ug unsay next action nga ilang himuon,” pasabot ni Antiquena dihang na-interview sa dyAB sa ilang pag-abot sa may South Bus Terminal.
Gipahibawo niini nga ilang iduso ang ilang petisyon sa Marina ug PCG aron din a makalarga og balik ang Georich.
“This is not the first incident nga same vessel.
To my knowledge this has been the third time nga ni-conked out ang main engine ani nga barko,” dugang pa ni Antiquena.
“Atong i-pressure ang management to cease and desist from operating until it becomes seaworthy again. 35 years old and it should never be allowed to continue its normal voyage until it becomes seaworthy,” pasabot ni Antiquena, kinsa nisaad nga iduso ang petisyon karong adlawa.
Ang GP Lines nga gitawagan sa Sun.Star Superbalita nipasabot nga di pa sila makahatag og pamahayag sanglit wa may trabaho kagahapon ug wa sa ilang buhatan ang ilang port captain nga si Jerry Enjambre.
Apan gipahibawo sa staff nga gawas sa ilang gihatag nga pagkaon ug transportation sa mga pasahero, gi-refund usab nila ang tiket sa tanang pasahero.
“Okey ra kon kami ang naalkansi ani, pinaskohan nalang namo sa among mga pasahero in the spirit of Christmas,” matod sa staff sa GP Lines.