Mga tulisan nailhan na, apan nakasibat sa pulis

NAILHAN na sa kapulisan ang mga tawo nga maoy suspek sa sunod-sunod nga pagpangawat ug pagpanulis dinhi sa siyudad sa Davao, apan sila nakaikyas dihang gironda ang ilang hide-out niadtong Miyerkules didto sa Barangay Baliok, siyudad sa Davao.

Si Police Superintendent Antonio Rivera, hepe sa Investigation Detection and Management Branch (IDMB) sa Davao City Police Police (DCPO) maoy nangulo sa hiniusang pwersa sa kapulisan nga mironda gitagoan sa grupo ni Garry Batondo.

Si Batondo nailhan sa alyas nga Nonoy ug lumad nga taga Kimamon, Kapalong, Davao del Norte.

Ang raiding team napakyas sa pagsikop sa grupo ni Batondo sanglit nakabantay ang mga kaubanan niini dihang nagsingabot ang kapulisan sa alas 11:00 sa buntag niadtong Miyerkules.

Gawas kang Nonoy, nailhan sab sa kapulisan ang mga kauban niini nga sila Jemar Batondo Ababan, alyas Larry; nagpuyo sa Canatan, Asuncion, Davao del Norte; Armnado Batondo, alyas Mando, nagpuyo sa Nabunturan, Compostela Valley Province ug Mario Bahian, 30, ulitawo ug nagpuyo sa Riverside, Calinan.

Mga molupyo sa dapit diin nagtago ang giingon nga mga suspetsado nagsulti sa kapulisan nga dihang nasiplatan sila sa mga suspetsado dali silang midagan sa hilit nga lugar bitbit ang ilang mga armas.

Gisuwayan paggukod sa kapulisan ang mga suspetsado apan wa na nila makita mao nga ilang gihiling ang hide-out ug didto ilang nakuha ang kinawat nga motor nga way plate number ug mga cellular phones.

Sa laing bahin, gilungkab sa wa mailhing mga kawatan ang balay ni US Lawyer Michael Fisher, 49, nagpuyo sa Blk 57, Lot 2, Chronicles Street, Susana Homes, Barangay Baliok niadtong Huwebes.

Base sa blotter sa Talomo Police Station, alas 2:10 sa hapon nadiskubrehan sa kabanay ni Fisher nga gilungkab ang ilang balay ug nahanaw na ang laptop nga nagkantidad og $750.00, necklace nga nagkatidad og $180.00 ug cash nga salapi nga nagkantidad og P55,000.00.

Mga intelligence officers sa Talomo Police Station naniid na karon sa palibot aron mailhan ug masikop ang mga kawatan. (AD)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph