NAPALGAN naglutaw na ang patay’ng lawas sa usa ka lalaki nga miambak sa tulay niadtong Dominggo sa Ysalina Bridge, siyudad sa Cagayan de Oro.
Nagburot na ang tiyan ug nanglagom na ang patay’ng lawas ni Dave Roland Lacerna, 23, adunay, kapuyo, taga Barangay Carmen.
Nakita ang patay’ng lawas niini sa mga residente nga naglutaw pipila ka metro ang kalay-on gikan mismo sa giambakan niini niadtong Martes mga alas 12:30 sa udto.
Giresponde sa Scene of Crimes Operatives (Soco) pangulohan ni Police Inspector Christian Caballes ug gibutyag niini nga posibleng ang pagkalumos niini maoy hinungdan sa iyang kamatayon.
Wala usab kini nakita nga foul play sa kamatayon sa biktima.
Ang kapuyo niining si Roselyn igo na lamang sa pagdangoyngoy ug dili makadawat sa gidangatan sa iyang kapuyo.
Kahinumduman, naghilak gihapon ang kapuyo niini niadtong Domingo human kalit kining miambak sa tulay human sila nagbikil tungod kay iyang gihatagan og kwarta ang usa ka hubog nga lalaki sulod sa usa ka videokihan nga hinungdan sa pagselos sa biktima.
Gani nagpatabang pa ang maong lalaki, misyagit nga nangayo og tabang kaniya human naglabugsak sa suba.
Pamahayag sa kapolisan sa Police Station 1 sa Divisoria nga kung desidido nga mosuway kini sa paghikog, dili na kini magsiyagit og mangayo pa og tabang. Apan gituohang nahadlok kini sa kusog nga bul-og sa tubig posibleng hinungdan sa pagsiyagit. (SVB)