TINUOD pildi na usab ang RP Gilas sa ikatulong higayon sa nagpadayon nga 2014 Fiba World Cup didto sa Espanya human kini munasa ginhawang napukan sa World’s no. 3 nga Argentina, 85-81.
Apan taliwala sa kapildihan mao ang lain na usab nga dakong selebrasyon sa mga Pinoy nga bisan pa man ug nabintahaan sa gitas-on ug gidak-on nakahatag gihapon og saktong kombati.
Kombati nga nakapaluspad sa mga Argentinians ilabi na sa ilang multi-titled coach nga si Julio Lamas kinsa miangkon nga nasurprisa siya sa style sa basketball nga gipakita sa mga Pinoy.
“The Philippines plays a very strange style of basketball we’ve never seen,” matod ni Lamas, ang beteranong coach kinsa aduna nay tulo ka titulo sa Argentina league ug usa ka division title sa Spanish tournament. “But they play to their full potential.”
Natural nga dili sinati ni Lamas ang dinuwaan sa mga Pinoy tungod kay sulod sa dul-an 40 ka tuig wala man gyud ni makasulod sa ingon aning level sa basketball.
Sa tinamban nga pagka-istorya, ubos ra gyud ang Pilipinas sa international scene sa natad sa basketball.
Sa kasaysayan, katapusang nakaduwa ang Pilipinas sa World championships niadtong 1978 nga gipahigayon sa Manila.
Tungod lagi kay maoy host, ang Pilipinas automatic nga adunay luna sa torneyo.
Pero nagsangka na diay ning Argentina ug Pilipinas niadtong 1974 didto sa Puerto Rico diin gidominar og maayo sa Argentina ang maong duwa.
Ug wa damha, 40 ka tuig ang milabay, sa ilang rematch niadtong usang gabii nagkapuliki ug daw sa gitugkan una og hubaghubag ang Argentina una nila mapatapsingi ang mga Pinoy.
Di sila ka tuo nga nabiyaan og duha ka higayon og 10 puntos sa 1st quarter. Nakabawi ug nalubong man tuod ni nila og 15 puntos ang Gilas apan wa damha nga sa naghinapos nga bahin sila na man hinuon ang nag-ung-ong sa kapildihan.
Kon di pa sa sayop nga desisyon ni Jayson Castro kinsa mihagad og itsa sa tres ug natapalan ni Pablo Prigioni, mahimong makaovertime pa unta o posibling modaog pa ang Gilas niadtong posesyona ilabi na og nawitik pa gilayon to niya ang bola ngadto ni Jeff Chan kinsa nagpaabot alang sa tres.
Pero that’s part of the pressure sa duwa. Usahay mawala ka sa focus.
******
Ambot og nganong wala na man gamita ni coach Chot Reyes ang Sugboanong si June Mar Fajardo sa third ug fourth quarter nga unta maayo man kaayo ning nakaduwa.
Mora og iya na lang gitugyan ang ilawom nga bahin ngadto ni Andray Blatche kinsa nagtakingking na lang nga dili na gani makalayat og makadepensa tungod sa angol sa tuhod.
Ang kakulang sa depensa ug sa rebound sa naghinapos nga bahin maoy usa sa dakong hinungdan sa ilang kapildihan.
Pila ka higayon nga naka-offensive rebound ang Argentina ug pila sab ka higayon nga giitsahan sa ilawom si Blatche.
Mas makabintaha pa gani ang Gilas ato kon gidungan na lang niya pagpasulod si Fajardo ug Blatche sa himatyong minutos total wa pa man ma foul trouble ang duha. Dinhi mora og dunay coaching lapses si coach sa iyang diskarte.
(junmigs0622@yahoo.com)