Migallen: Congrats, Petron!

AMBOT naunsang pagka-unsaa nga sukwahi sa ilang nangaging mga duwa, wa na man hinuon magkadimao ang dinuwaan sa Talk ‘N Text sa Game 7 sa finals series niadtong Dominggo batok sa Petron Blazers Boosters sa PBA Governor’s Cup.

Ang resulta gidominar na hinuon sila sa Blazers ubos sa ilang bag-ong coach nga si Ato Agustin. Nagsugod og kadag-om ang paglaom sa Texters nga makuha ang titulo sa dihang na-injured ang usa sa ilang pambato nga si Jason Castro human kini matingkulo pagtugpa gikan nga nag-layup.

Gidala sa dressing room ug pipila ka minuto gipabalik kini ni coach Chot Reyes apan klaro kaayo nga nagping-it gihapon sa kasakit nga gani di na kaambak. So, gi-pull out na lang ang flashy pointguard.

Sa pagkawagtang ni Castro, bisan gani ang MVP awardee Jimmy Alapag, Kelly Williams, Ryan Reyes wa makatapak sa buslot nga nabiyaan ni Castro. Ang giingong rescuer nga si Larry Fonacier uga usab kaayo sa opensa. Nangigo unta si Ranidel de Ocampo pero kuwang siya sa backup.

Samtang sa pikas bahin, ang Petron sa bisan asa nga eskinaha perming swak ang net. Ang three-point shot nila ni Arwind Santos, Alex Cabagnot, Dennis Miranda ug sa import nga si Anthony Gundy maoy mibuak sa depensa sa Texters. Di lang sa opensa grabi usab og gipakita si Santos sa depensa ug sa rebounding department. Kini maoy rason sa iyang pagka-MVP sa finals. Wa usab magpabitin ang beteranong si Danny Ildefonso.

Pero overall, ang kinatibuk-ang puwersa sa Blazers maoy responsabli sa paglangkat sa korona nga maoy ika-19 nga titulo sa ilang prankisa ug unang titulo ni Agustin isip coach sa PBA. Congratulations, Petron!

*******

Porbida. Gigisa og maayo ang Philippine Olympic Committee (POC) ug ang Philippine Sports Commission (PSC) sa gihimong imbestigasyon sa senado kalabot sa kontrobersiyal nga issue sa bag-ong world champion nga Philippine Dragon Boat Federation (PDBF).

Sa imbestigasyon milutaw ang grabing pulitika sa sports sa nasod ug di lang kay ang PDBF ra ang naigo niini kon dili lakip na usab ang pipila ka mga national sports association. Nagkapuliki og panubag si Jose Cojuangco, ang presidente sa POC ug ang iyang kaabin nga si Richie Garcia, chairman sa PSC.

Sa iyang pagbisita sa Sugbo sa niaging semana, si Garcia miingon nga sila sa PSC di makahatag og financial support sa mga sports association kon di kini recognize sa POC.

Apan didto sa senado nausab ang intunada ni Garcia sa dihang giingnan siya ni Senador Koko Pimentel nga wa may balaod nga naglatid sa ingon niini.

Iyang giangkon nga makasuporta diay sila pero kinahanglan gyud nga magmatngon sila kon kinsa ang angay nga suportahan kay nahadlok sila nga tingali og mosunod ang ubang mga yamokmok nga pundok. Tan-awa ra.

Ang-ang man og ilang hatagan nang way klaro. Pero katong PDBF World championship gud to nya wa gyud sila kahatag og finanacial support?

(Junmigs0622@yahoo.com)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph