Migallen: Sistema, senador

ADUNAY balaudnon karon nga nag-ung-ong sa Senado nga kon mapasar aduna na unyay ahensiya nga magtutok na unya og maayo sa boksing sa nasod.

Si Senador Koko Pimentel maoy nagpanday sa maong balaudnon nga magtukod og Philippine Boxing Commission (PBC) aron mao nay mohatag ug mopatunhay sa kasiguroan sa mga Filipino boxers.

Sa ato pa, di na makapanghilabot ang Games and Amusement Board (GAB) sa professional boxing sa nasod kay ang PBC na ang bahala sa tanan. Hinuon kon gikinahanglan, motabang usab ang PBC sa mga amateur boxers.

Ang GAB, pasabot ni Pimentel, mo-concentrate na lang sa ubang professional sports sa nasod.

Ingon ni Pimentel, vice chairman sa Senate Committee on Youth and Sports,  nga ang commission mao usab ang mangita og paagi nga matagaan og pension ug ingon man retirement benefits ang mga boksidor.

Kining maong balaudnon, maisip nga maoy tubag ni Pimentel sa sunodsunod nga kontrobersiya nga miigo sa natad sa pamoksing sa nasod. Tiaw mo bay wa pa gani mahuman ang unang tulo ka buwan ning tuiga, gihamok na sa upat ka mga dagkong kontorbersiya ang natad sa pamoksing sa nasod.

Ang kamatayon ni Carlo Maguinto human sa away tungod sa blood clot sa iyang  utok, ang nahitabo ni Johnriel Casimero ug kaubanan nga gipangkulata didto sa Argentina human modaog batok ni Luis Lazarte, ang pagpadala ug peke nga Mexicanong boksidor nga isangka ni de kalidad nga Rey BoomBoom Bautista ug ning uwahi lang ang kalit nga pagbackout ni Rodel Mayol sa iyang world title fight batok Tyson Marquez didto Mexico tungod sa alegasyon nga gitikasan kini atol sa tinimbangay maoy mga nanag-unang isyu nga nagbansiwag sa mga local ug international news.

Di gusto si Pimentel nga mausab pa kining maong mga panghitabo ug pinaagi unya sa PBC kini malikayan na.

Maayo kining panglantaw ni Pimentel. Makabenepisyo ang mga boksidor niini.

Pero, yuna ra. Mora man og dugay na tang nakadu­ngog niining tunoha gikan sa mga pulitiko?

Kaniadto pa man ning pasaliga nga motumaw lang og duna nay kontrobersiya. Unsa may kasiguroan nga ang PBC makapalambo sa professional boxing sa nasod?

Di kaha taga Manila ra gihapon ang modominar ning maong ahensiyaa? Bisan og pila pa ka

ahensiya sa boxing ang tukoron basta ang sistema mao ra gihapon balik-balik ra ning mga problemaha.

Higpit ug estriktong pagpasunod sa balaod maoy angay nilang buhaton ug hingpit nga pag-usab sa sistema. Mao ning gikina­hanglan, Senador.

(Junmigs0622@yahoo.com)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph