Mike `miulbo’ kay SB 2 wa pa gipasar sa konseho

NAUPOS na ang pailob ni Mayor Michael Rama sa pagpaabot nga maaprobahan sa Cebu City Council ang iyang Supplemental Budget No. 2 kay nangala­ngan na og maayo ang pagpatuman sa mga batakang serbisyo.

Apan si Bise-Mayor Joy Augustus Young niingon nga ang administrasyon karon maoy napakyas sa ilang gimbuhaton pinaagi sa paghatag kanila sa gikinahanglang mga supporting document.

Matod pa sa mayor nga karon ang Konseho gustong mahatagan og award isip labing maayong konseho.

Apan kon siya ang pangutan-on, maayo ning nakabaraw sa iyang mga programa alang sa katawhan.

Gikwestyon usab ni Rama ang grabe kakuti nga pamaagi sa konseho pag-aprobar sa iyang kapin P200 milyones nga SB nga gipangayo.

Siya niingon nga niadtong 1998, kanus-a konsehal pa siya, paspas ug dali ra ang pagpalabang sa mga supplemental budget.

Apan karon nga kontra na niya ang konseho, gikuti-kuti siya pag-ayo nga susama ra man ang mga tawo nga naglangkob niini, dugang ni Rama.

“Unsa may inyong gusto? Klaroha na. Kay ang pasyensya sa mayor nahurot na. Ug mao man gani na inyong gusto nga i-prejudice ang mga tawo, way gasoline, hala sige. Unsa may inyong gusto aron ingnon ang mayor maoy incompetent? Kamo maoy incompetent!,” mensahe ni Rama sa Konseho.

Apan kon si Young ang pasultihon, wa sila maglangay sa pagpalabang sa supplemental budget no. 2 nga gipangayo ni Rama kon di nangayo lang sila sa dugang mga requirement.

Gipadayag ni Young nga apil sa SB 2 ang sweldohan sa mga job order employee apan wa gibutang og pila ka buok ang bayranan.

Nanagana ang bise mayor nga sweldohan sa City Hall ang mga JO nga giingong gigamit ni Rama sa pamulitika diin ang uban ilang nakita sa mga pulong-pulong sa mayor.

Dugang ni Young nga ang pag-aprobar sa SB2 magdepende sa mga papeles nga isumiter sa buhatan ni Rama kay di sila gusto nga ipalabang kini nga wala magbuhat sa ilang trabaho aron di sila mabasol.

Daghan usab silang gipangayo gikan sa mga buhatan sa Budget, Accounting ug Treasurer’s office alang sa pagpalusot sa SB2.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph