GIPANID-AN karon sa mga sakop sa Mandaue City Police Office (MCPO) kon kinsa ang nilabay sa fetus kun puya ngadto sa ilawom sa taytayan sa bag-ong merkado sa Mandaue.
Niadtong Biyernes, pasado alas 11:00 sa udto, nakadawat og taho ang kapulisan nga adunay fetus nga naglutaw.
Gisusi kini sa mga sakop sa Investigation Detective Management Branch (IDMB) sa MCPO pinangulohan ni Insp. Zenaido Sanchez.
Didto ilang nakita-an ang puya nga iya sa usa ka lalaki nga gibanabana usa ka buwan nga naglutaw sa ilawom sa tulay sa Sityo Trinubal, Barangay Centro.
Si PO3 Marino Lofranco sa IDMB nga nahinabi sa Sun.Star Superbalita miingon nga ang patayng' lawas ilang gitugyan ngadto sa lokal nga punerarya.
Samtang, padayon pa ang ilang gihimong imbestigasyon kon si kinsa ang walay puangod nga inahan o bisan kinsa nga milabay sa maong bata. (DRT)