HUMAN sa pipila ka buwan nga pagtagotago nasikop sa kapulisan ang usa ka lalaki kinsa gipasanginlang milugos sa iyang 13-anyos nga pag-umangkon sa may Sitio Atis, Barangay Banilad, dakbayan sa Mandaue niadtong Martes sa hapon.
Si Allan (dili tinuod nga pangan), 20, ulitawo, ang nasikop sa kapulisan sa balay sa iyang higala mga 20 metros ang gilay-on sa ilang balay.
Ang pagsikop gibasi sa warrant of arrest nga gi-isyu ni presiding judge Teresita Abarquez-Galanida sa Regional Trial Court, Branch 56 niadtong buwan sa Enero ning tuiga tungod sa kasong pagpanglugos in relation to child abuse kon Republic Act 7610.
Walay pyansa nga girekomendar alang sa iyang temporaryong kagawasan kinsa gitanggong na karon sa Casuntingan police station.
Niadtong Agusto 2012 ang biktima nakahigayon sa pagsulti sa iyang magtutudlo nga siya gilugos ug mao ra usab kini ang mi-report ngadto sa kapulisan.
Ang biktima miasoy nga gilugos siya sa suspek sa makadaghang higayon sa balay sa apohan sa gikatahapan.
Human ma-report ang gikatahapan nagtagotago na apan niadtong miaging adlaw ang kapulisan nakadawat og tawag gikan sa usa ka concern citizen labot sa presensya sa suspek sa lugar.
Dali kining giadto sa mga pulis nga gipangulohan ni PO3 Cedric Castillo ug gidakop.
