Minahan bungkagon na - Arreza

BUNGKAGON ang mga small-scale nga minahan, ibalhin sa luwas nga dapit ang pamilya sa minero o papaulion asa sila gikan.

Mao kini ang gihingusgang plano sa nasyunal nga gobyerno, kaabag ang local government unit ug nagkadaiyang ahensiya sa kagamhanan, labot sa kahimtang sa mga small-scale miners nga nanimuyo sa mga high-risk areas diha sa Pantukan, Compostela Valley.

Giangkon ni Edilberto Arreza, regional director sa Mines and Geosciences Bureau (MBG) dinhi sa rehiyon nga dunay 19 ka mga small-scale mining area sa Pantukan nga gikonsidera nga high-risk sa landslide o pagdahili sa yuta.

"The government want to stop the operation and dismantle all gold-processing plant and shanties, close their operation para di na mausab ang nahitabo sa Barangay Napnapan," ni Arreza atol sa Kapihan sa SM kagahapon.

Nasayran nga sagad sa mga minero nga anaa sa Pantukan taga laing lugar.

Usa sa gilantaw nga solusyon mao ang paghatag kanila og tabang, ihatud sila sa tagsa-tagsa nila ka dapit aron makasugod sila sa ilang mas luwas nga panginabuhian.

Sa pikas bahin, giangkon ni Arreza nga wala gyud istrikto nga mapatuman ang 'No Habitation Policy' ang kamanduan nga giaprubahan sa probinsiya sa Compostela Valley sa nakalabay nga tuig.

Ilawom sa No Habitation Policy, mga minero na lamang ang tugutan nga mag- istar sa usa ka minahan, di na mahimong mopuyo ang ilang pamilya aron malikay sa disgrasya.

"Mao gyud na ang problema kay nganong mobalik-balik gyud ang mga miners sa area. Isa pa, wala puy naka-monitor sa pagbalik sa mga miners didto bisan migawas na ang report nga nga may liki na nga nakita sa Diat," ni Arreza.

Sa kasamtangan, nagpadayon ang 'recovery effort' alang sa wala pa makita nga natabunan og yuta sa Diat 1, Barangay Napnapan sa miaging semana.

Sa rekord, Enero 8, alas singko sa hapon, anaa na sa 32 ang patay, 28 kanila ang nailhan, upat ang wala pa mailhi samtang 38 sab ang missing. (Rhona O. Goc-ong)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph