Minero gitulis ug gipusil

USA ka minero gitulis ug gipusil didto sa lungsod sa Maragusan, Comval Province, Sabado sa gabii.

Nailhan ang biktima nga mao si Bernie Abellana, hamtung ang panuigon, molupyo sa Purok 7, Barangay Maniki, lungsod sa Kapalong, Davao del Norte.

Mga suspek sa maong hitabo gitumbok nga sila alyas Reynante, alyas Union, alyas Jo, ug alyas Eric.

Sa report gikan sa Comval Province Police Provincial Office, nasuta nga nahitabo ang insidente pasado alas 6:30 sa gabii samtang nagbaktas si Abellana sa nahisgutang lugar ug pauli na unta sa Sityo Butay, Barangay Pamintaran kuyog ang usa sa mga suspek nga si alyas Eric.

Apan wala madugay, kalit nga mibutho ang lain pang tulo ka mga suspek ug mideklara og tulis ngadto sa biktima.

Wa nay nahimo ang biktima sa dihang gitiunan siya og armas ug nakuha ang iyang kuwarta balor og P25 mil, cellphone ug mga alahas.

Gigapos pa sa mga suspek ang biktima gamit ang tie box ug gipusil gamit ang kalibre .45 nga pistola.

Human makuha ang tuyo, mga suspek dayon nga misibat padulong sa wa matino nga lugar.

Samtang ang biktima daling gidala sa Maragusan Municipal Hospital.

Apan tungod sa grabing samad sa biktima gibalhin siya sa Davao Regional Hospital sa siyudad sa Tagum.

Kapulisan sa lungsod sa Maragusan mihimo na og dugang imbestigasyon sa hitabo. (Marvin Pineda)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph