Misuroy sa beach gipusil

USA ka menor de edad ang gipusil sa wala mailhing lalaki alas 12:15 kagahapon sa kaadlawon samtang misuroy didto sa Bonguyan Beach Resort, Barangay Matina Aplaya, siyudad sa Davao.

Ang biktima mao si Michael Lobre, 16, nagpuyo sa Block 26, Lot 13, Phase 1, NHA Bangkal, ning siyudad.

Base sa blotter sa Talomo Police Station, ang biktima gipusil sa usa ka lalaki nga miduol kaniya sa maong resort.

Giingon nga gisita ang biktima sa lalaki, apan nakadagan siya palayo sa resort, apan gigukod siya dayon gipusil duha ka higayon.

Ang biktima naigo sa iyang ulo mao nga giobserbahan siya sa Southern Philippines Medical Center.

Sa pagsusi sa kapulisan sa lugar, nakuha nila ang basiyo sa .9mm caliber pistol nga gituohan nga maoy gigamit sa pagpamusil.

Ang kapulisan sa Talomo nagsusi na kagahapon sa maong hitabo aron mailhan, masikop ug idemanda ang namusil sa biktima.