TUMANON sa kagamhanan sa lalawigan sa Sugbo ang kasabutan tali sa usa ka kompaniya nga nagpahigayon og pagtuon sa pagtukod og ikatulong taytayan sa dili pa mohimo og opinion si Gob. Hilario Davide III kon asa haom pabarugon ang duha ka tumoy sa taytayan.
Si Davide namahayag nga gitahod niya ang sugyot ni kanhi Kong. Eduardo Gullas nga sa dakbayan sa Talisay ibutang ang usa ka tumoy sa giplanohang tukoron nga third bridge sa Sugbo.
“I can’t make a judgment until we have katong study sa Metro Pacific. Kay naa man tay MOA ana nila gud. We are bound by that MOA,” nagkanayon ang gobernador sa pakighinabi sa mga tigbalita niadtong milabayng semana.
Ang iyang gipasabot mao ang gipirmahan nga memorandum of agreement tali sa probinsya, kagamhanan sa dakbayan sa Sugbo ug Metro Pacific Tollways Corp., nga maoy nagpahigayon og pagtuon sa pagtukod og ikatulong taytayan nga magsumpay sa Shell Island sa lungsod sa Cordova hangtod sa baba sa Guadalupe River sa habagatang bahin sa siyudad sa Sugbo.
Si Davide niklaro nga bisan og adunay kasabutan apan ang gipahigayon sa Metro Pacific usa pa lang ka feasibility study ug di pa ang aktwal nga proyekto diin angay manukad ang taytayan sa habagatan o amihanang bahin ba sa Sugbo.
“There are lots of possibility gyud no. Ang objective ani is a third access to Lapu-Lapu. Kay we realize nga congested na kaayo ang traffic, daghan na kaayong mga sakyanan,” pasabot niya.
Ang gobernador niingon hinuon taas-taas kon anha sa dakbayan sa Talisay magsugod ang pikas tumoy sa ikatulong taytayan.
Si Gullas unang nisugyot nga ang usa ka tumoy sa taytayan anha tukoron sa Barangay Tangke o Barangay San Roque sa Talisay City nga di lamang makabenepisyo sa siyudad kon dili apil usab ang ubang mga lugar sa habagatang Sugbo.
Apan, si Cebu City Mayor Michael Rama supak sa sugyot sa kanhi kongresista ug niingon mas maayo magtukod og ikaupat nga tulay si Gullas. (SCG)