Mongaya: Condo ni Corona

AMBOT kon nibuto na ba sa mga mantalaan sa Manila kining eksplosibo nga expose nga gisulat ni Raissa Robles, usa ka investigative journalist, diha sa iyang blog nga raissarobles.com apan makapanglimbawot sa balhibo ang kalaki niining Chief Justice Renato Corona diay.

Unang reaksyon nako dihang niguwa ang isyo kabahin sa Megaworld condo ni CJ Corona mao nga kadato diay niana niya, maka-afford man og P14 million nga condo.

Apan, sa pagpanukiduki ni Robles, iyang nasayran nga barato ra diay kining condo nga P14 milyones. Naka-discount og minilyon diay kini si Corona.

Wa siya moklaro sa pagsulti kon ngano. Iya lang gihisgutan nga dunay desisyon si Corona, dihang associate justice pa siya, nga pabor sa Megaworld sa miaging 2002. Di man sab kini malimod kay naa man gi-post sa Supreme Court website. Nag­kinahanglan lang og mga kugihan nga tawo nga molili sa tanang mga anggulo.

Naghimo ko og komentaryo niining expose ni Raissa sa politika2013.wordpress.com ug ang link gipasa kang Totol Batuhan, ang bugtong Sugboanon nga volunteer prosecutor, pinaagi sa iyang Facebook. Ug nalipay ko sa tubag ni Totol nga nakahibawo na sila kabahin niini ug ila kining gi-follow up isip lead sa ilang pangandam sa kasong impeachment.

Alang kanako, sa ingon niining daghan diay og tinaguan si Chief Justice Corona, magpunga-punga gyud ni siya sa pagpanapo inig abot sa Senate impeachment hearings.

Bisan pa man og dunay mga senador nga modupa kaniya (sa kaubos sa credibility rating ni Corona karon siguradong maangin ang mga senador nga mopakitag pagdupa kaniya), sigurado ko nga mangguwa pa ang dugang mga detalye ug dugang mga testigo.

Mapareha kini kaniadtong impeachment hearing ni kanhi presidente Estrada nga morag

teleserye nga gisunod sa katawhan kay kulba-hinam ang pagpagawas sa mga bag-ong ebidensiya ug ang mga paagi sa mga pro-Erap nga mga senador sa paglugpit niini.

Ug ang media pagpista sa matag expose. Blow-by-blow account sa ilang pagtuki sa matag suok sa kinabuhi ni Corona mahitabo.

Atong nakita sa expose ni Raissa nga di kaayo lisod ang pagkaykay sa mga detalye sa mga transaksyon ni Corona.

Mosamot kini kon mapakita na sa Chief Justice ang iyang SALN kun statement of assets, liabilities, and net worth nga hangtod karon iyang gitago-tago kon naa man gani.

Inig pagawas nianang maong dokumento, siguradong kunis-kunison kini di lang sa mga senador ug prosecutor, hasta ang publiko unya moapil pinaagi sa media ug sa Internet.

Nakita na nato karon kon unsa ka epektibo ang mga expose sa traditional media ug sa social media. Siguradong magkamuritsing si Corona. Alang kanako, mas maayo pag mo-resign na lang siya.

NGANONG DID-AN?

Nahibulong gyud ko sa re­aksyon sa pipila ka mga senador kabahin sa pagbutyag sa prosekusyon sa ilang ebidens­ya sama niining condo sa Megaworld nga mao ang Bellagio 1. Naa kini sa Fort Bonifacio City nga prime lot sa Metro Manila.

Alang sa pipila ka mga senador, angay kuno nga una silang makahibawo sa maong mga ebidensya kay sa publiko. Moingon pa nga kabahin na kini sa merits sa kaso nga wa pa gani magkasugod gyud ang husay.

Nahadlok sila nga makum­binser ang publiko nga sad-an si Corona unya masukwahi sa ila unyang desisyon?

O nahadlok sila nga basin moluwat hinuon si Corona ug di na hinuon madayon ang impeachment trial ug mawad-an ang mga senador og kahigayonan nga maka-grandstand.

A sigi na lang. Nasiguro ko nga di man sab magpagawong ang media ug ang mga ordinaryong tawo sa social media.

(inbetweencolumns.wordpress.com)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph