Mongaya: Sistema sa pagtudlo ni Bernido

PIPILA ka semana nga milabay, giinterbyu ko sa mga sakop sa Student Alliance for Nationalism and Democracy (STAND) kabahin sa kaagi sa mga aktibong tinun-an sa University of San Carlos sa katuigan sa wa pa matukod ang maong kapunongan. Kining Stand usa sa mga partido diha sa student government diha sa maong unibersidad.

Ako silang gisuginlan nga dihang nagsugod ko sa pagka aktibo sulod sa tunghaan, wala pa mabalik ang student government. Apan naglusad kami og usa ka kalihokang protesta batok sa pagsaka sa tuition kaniadto pang 1979.

Niadton tungora, usa sa among mga demanda mao na ang pa-revive sa student government aron dunay klarong mekanismo nga makapadayag ang mga tinun-an sa ilang mga sentiment kabahin sa pagpadagan sa tunghaan.

Isip tinun-an nga nagbayad alang sa edukasyon, angayan man sab gyud paminawon sa administrasyon sa tunghaan ang ilang mga sentiment kabahin sa pila ang bayad sa alang sa gisaad nga kalidad nga edukasyon. Ug dakong isyo kaniadto mao kining tinuig nga pagsaka sa tuition.

Ang ako lang masulti karon, pipila ka dekada nga milabay nga sama rag mao ra gihapon ang kahimtang. Tinuig gihapon magsaka ang tuition. Ug di lang kini sitwasyon sulog sa USC. Tungod niini, makaingon ko nga sakto kining mga kritiko sa sistema sa edukasyon sa nasud.

MGA INISYATIBA

Samtang wa makasulbad ang mga kagamhanan human nahugno ang diktadurya ni Marcos kaniadtong 1986 niining kahimtang sa atong sistema sa edukasyon, dunay lain-laing mga inisyatiba ang pipila kabahin sa pagpalambo sa edukasyon.

Usa niining dunay malampusong inisyatiba mao ang magtiayong Bernido sa Bohol nga nakamugnag sistema sa high school nga barato alang sa mga kabus apan nakapalambo mismo sa mga tinun-an labi na sa pagkat-on niining science ug math.

Tungod sa ilang inisyatiba, nakadawat sila sa miaging tuig og Ramon Magsaysay Award. Ug alang kanako, maayo nga sundon kining ilang gibuhat sa tibuok nasud.

Mao nga nalipay kaayo ko nga karong adlawa, si Dr. Christopher Bernido maoy guest speaker sa Don Bosco Homecoming diha sa Don Bosco Technology Center (DBTC) kay makapaminaw kita sa iyang kalampusan.

Mapasigarbuhon ko nga kini si Bernido us aka Bosconian. Produkto siya sa Don Bosco Mandaluyong ug karon naa siya sa DBTC atol sab sa atong paglusad sa Blessed Merville awards alang sa mga Bosconian nga dunay mga talagsaong kalampusan ug kadtong dunay dakong natabang sa katilingban labi na sa edukasyon.

METRO SA TAXI

Ako gyud nga gidalikyat pag-adto ang opisina ni Director Ahmed Cuizon sa Land Transportation Franchising Regulatory Board (LTFRB) dihang akong nabalitaan nga magsugod ang maong buhatan sa pag-check sa mga metro sa taxi ugma.

Akong gipaabot ang mga reklamo kabahin sa mga paspas nga metro.

Di man gyud tinuod nga nasulbad kini ug kaayo ko nga lakip sa mga dakong kompanya sa taxi nga dunay daghang mga unit nga nanubra ka paspas nga metro mao kining Corominas ug Holiday.

Kon halos tanang taxi nga akong masakyan sa maong kompanya nanubra ka paspas, lisod tuohan nga blind ang operator ug wa kini niya tugoti.

Alang kanako, mas maayo gyud kon ang gukdon mao mismo ang mga operator nga maoy tag-iya sa mga yunit sa taxi ug di lang ang drayber aron silang tanan magbinantayay ug magkinto.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph