NASIKOP sa kapolisan ang ikaduha sa listahan sa most wanted person pinaagi sa man-hunt operation niadtong Huwebes mga alas 9:00 sa gabii sa Relocation Site Calaanan, Canitoan ning siyudad sa Cagayan de Oro.
Ang suspetsado naila nga mao si Ricardo Tubo Jr., 18, ulitawo ug residente sa Block 25, Lot 9, House #35, Relocation Site Calaanan, Canitoan ning siyudad.
Sa pakighinabi sa Sun.Star Superbalita ngadto kang Police Inspector Arthur Gaston, Deputy Station commander Police Station 7 sa Bulua (PS7), nga anaa ang suspetsado sa ika duha sa ilang listahan sa mga most wanted person station level nga adunay kaso nga paglapas sa Republic Act 7610 kon Child Welfare Act.
Gidugang pa nga dugay na nila kini nga gipanid-an tungod kay sa dihang menor de edad pa kining suspetsado usa naman kini ka offender. Aduna na kini mga wala pa nahuman nga kaso diha sa ilang buhatan sa PS7.
Gisikop kini sa kapolisan pinaagi sa usa ka warrant of arrest nga giisyu ni Judge Evelyn Gamotin Nery, Presiding judge, Branch 19, Regional Trial Court 10th Judicial Region ning siyudad ug dunay criminal case number 2014-22 sa maong kaso diin adunay piyansa nga P80 mil alang sa iyang temporaryo nga kagawasan.
Karong panahona, nagtingkagol na sa Maharlika Detention Cell aron sa pag-atubang sa kasong ipahamtang batok sa maong suspetsado.