Most wanted sa Ormoc nadakpan

ORMOC CITY — Wa makaikyas sa mga kamot sa awtoridad ang Top 1 most wanted person ning dakbayan human masikop sa niaging buwan didto sa Barangay Puertobello, lungsod sa San Francisco, isla sa Camotes.

Nunot sa gipagawas nga warrant of arrest sa kasong murder ug robbery with homicide batok sa suspek nga si Ernest Sydney “Kano” Keeler, 26, ulitawo ug lumad sa Kananga, Leyte, nilampus ang kapulisan sa pagsikop kaniya.

Ang nisikop kang Keeler mao ang grupo ni P/Insp. Benigno Niemes, hepe sa Milagro Patrol Base ning dakbayan, nga nakig-alayon sa kapulisan sa San Francisco.

Atol sa pagsikop kang Keeler sa balay sa iyang live-in partner sa nahisgutang lugar, nisukol siya sa kapulisan pinaagi sa pagpinusilay sa grupo ni Niemes ug nisuway sa pag-eskapo sa bukirang bahin sa lugar ug human sa hamubo nga engkwentro nga niresultang naigo sa liog ang suspek unya naigo usab sa iyang tiil si Niemes. Ang duha daling gidala sa San Francisco Hospital.

Si SPO1 Maria Rachel Salas, PCR sa Ormoc City Police Office, nagkanayon nga ang suspek usa ka lider sa sindikato nga maoy utok sa mga tulis ning dakbayan.

Si Keeler gitumbok usab nga maoy suspek sa pagpatay sa 29 anyos nga Chinese-businessman ug tag-iya sa Tsinoy’s Grill ning dakbayan nga si Kris Dy nga napalgang patay sud sa iyang sa sakyanan niadtong milabayng tuig.

Midugang si Salas nga sagad sa gitulis sa grupo ni Keeler mao ang mga business establishment.

Usa ka bag-ong biktima sa pagpanulis sa niaging Marso 18 sayo ning tuiga ang positibong nitumbok kang Keeler nga maoy mitulis kaniya.

Ang biktima nga wa mopaila sa iyang pangan nagtinguhang mopasa­kag kasong robbery batok sa suspek.

Human sa pagkasi­kop, nakuha gikan kang Keeler ang usa ka Ingram sub machine gun nga may tulo ka magazine nga puno sa bala, duha ka kalibre sa .45, usa ka kabhang sa kalibre .45, duha ka bandol nga marijuana, usa ka bandol nga rolling paper, duha ka paketing gituhoang shabu, pito ka PHCCI Passbook, usa ka City Savings Bank passbook, usa ka Greenbank passbook, duha ka Green Bank sa Caraga Lata Savings, duha ka tseke sa Metrobank ug RCBC, 45 ka tseke sa BDO, 11 ka tseke sa Bank of Commerce ug upat ka tseke sa PS Bank.

Gibutyag usab ni Salas nga managlahi ang pangan nga nasuwat sa mga tseke nga nakuha gikan kang Keeler.

Kasong robbery, murder, illegal possession of firearms ug kalapasan sa Republic Act 9165 kon Comprehensive Dangerous Drugs Act ang giandam sa kapulisan batok kang Keeler.

Anaa karon sa Ormoc District Hospital (ODH) ang suspek nga padayon nga gitambalan ug napailin sa iyang samad samtang hugot nga seguridad ang gipahigayon sa kapulisan sa nahisgutang tambalanan. John Kevin D. Pilapil, Corres­pondent

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph