Motor gikarnap sa 2 pasahero

LAING motorsiklo na sab ang gidagit didto sa lungsod sa Hagonoy, Davao del Sur niadtong milabay'ng adlaw.

Subay sa taho gikan kang Police Inspector Gil Arobo, hepe sa Hagonoy Police Station, usa ka Raymart Villarino, 18, estudyante ang nahimong biktima sa maong pagpangdagit og motorsiklo.

Sumala pa ni Arobo nga giparada sa biktima ang iyang motorsiklo nga usa ka Honda Wave ug nagbaton sa plaka nga MC 9271 ug nakarehistro sa ngan ni Reynente Villarino sa kilid sa Jacks Bakery sa siyudad sa Digos.

Human niya maparada ang motor, dunay miduol sa biktima nga usa ka babaye ug lalaki ug gihaylo nga bayran og usa ka gatos ka pesos aron nga magpahatud didto sa Barangay Leling sa Hagonoy.

Misugot dayon ang biktima. Apan pag-abot nila sa nahisgutang lugar, ang lalaking sakay sa motor mihangyo nga didto na lang sila ihatod sa babaye sa Barangay Mahayahay ug mopuno sila og laing P100.

Apan wa magdahom ang biktima nga sa ilang paghidangat sa gitudlong lugar, pugsanong gipakanaog siya ug dayon gidagit ang iyang motorsiklo padung sa lungsod sa Matanao, Davao del Sur nga direksyon.

Ang kapulisan nihimo na og manhunt operation karon batok sa mga suspek aron nga mabawi ang motorsiklo sa biktima. (Dondon Dinoy)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph