USA ang missing ug laing duha ka mga mananagat ang naluwas human ang ilang gisakyang pumpboat ang giingong nabanggaan og barko sa kadagatan sa Barangay Pugalo, lungsod sa Alcoy, habagatan sa lalawigan sa Sugbo niadtong Sabado, alas 2:30 sa hapon.
Atol ning pagsuwat, ang missing mao si Christopher Aguitong, 32, minyo ug taga Barangay Consolacion, lungsod sa Dalaguete.
Naluwas sa mga tripolante sa barko mao sila si Armando Edillon, 24, minyo, ug Tirso Belista, 26, minyo, managsilingan sa Dalaguete.
Ang m/v Sunroad Yatsuka, Panamenian registered cargo vessel nga gipanag-iya sa Polar Starline sa Japan, gimaneho ni Captain Ogani Yefohiko, Japanese national.
Si PO3 Emelio Carungay, imbestigador sa Alcoy Police nga nahinabi sa dySS Super Radyo ug Sun.Star Superbalita, nagkanayon nga ang barko, lakip ang mga tripolante, gitanggong dihang nidunggo sa pier sa lungsod kagahapon sa buntag.
Ang kabanay sa mga biktima unang nidangop sa kapulisan sa Dalaguete bahin sa hitabo.
Si Ogani nipakita og mga hulagway sa mga biktima nga ilang naluwas nga sila si Edillon ug Belista ug kagahapon na sa buntag nakauli sa ilang dapit.
Ang mga biktima mibutyag nga alas 10:30 sa buntag niadtong Sabao, nalunod ang ilang pumpboat samtang namukot sa kadagatan sa Alcoy.
Nag-utaw-utaw sila sa kadagatan nagsige’g kawaykaway sa pagpangayo og panabang hangtud nga niagi ang maong cargo vessel sa alas 2:00 sa hapon niadtong Sabado gikan sa China.
Tungod sa ilang pagkawaykaway, dunay crew sa barko nga nakakita ug giluwas ang mga biktima.
Apan nialigar ang mga biktima nga dihang nagkaduol ang cargo vessel gibanggaan ang katig sa pumpboat hinungdan nga napugos sila sa pag-ambak sa dagat.
Ang pumpboat o sakayan dili hingpit malunod bisan masudlan og tubig.
Sila si Edillon, ug Belista naluwas sa mga tripolante sa barko apan si Aguitong wala na igkita, hangtud sa alas 6:00 sa gabii, gipangita apan negatibo ang resulta hangtod ning pagsuwat.
Apan sa pagsusi sa kapulisan sa pumpboat, wala kini madaot o bisan unsa nga timailhan nga nadasmagan gawas sa buslot sa tunga niini.
“Sa ilang marine protest gipakita nila ang mga hulagway nga giluwas nila ang mga biktima nga nakit-an mihunong pa gani sila, pero ang mga biktima nialigar man hinuon nga gidasmagan,” dugang ni PO3 Carungay.
Ang Philippine Coast Guard (PCG) nikompirmar kagahapon sa buntag nga dunay clearance ang barko nga makadunggo sa pantalan sa Philippine Mining Service Corp. sa Barangay Pugalo.
Gipadayag niini nga posibling sa pagbawod dihang naduol ang barko maong nasaghiran ang pumpboat apan, wala man maguba sukwahi sa ilang gitug-an sa kapulisan.
Ang missing nga si Aguitong gikatahong nagdala pa kini og galon dihang niambak apan kalit lang nga nahanaw, dugang sa imbestigasyon sa kapulisan. (Dugang ni Alan Tangcawan)