Nadela: Hukom sa huwes di malalis

DUHA ka huwes ang wa mopabor kang Manny Pacquiao sa ilang away gahapon batok kang Timothy Bradley, sila si CJ Ross ug Duane Ford.

Si Judge Jerry Roth nihatag og score nga 115 pabor kang Pacquiao, og 113 ngadto kang

Bradley. Kung sumadahon ang score sa tulo ka judges mogawas nga split decision ang kadaugan ni Bradley og kapildihan ni Manny. Kay split decision man, mogawas sab nga hilabihan ka sikit ang scoring, busa mogawas nga nagbawosbawos og kulata ang duha ka boksidor. Nagbawosbawos ug kulata sa kauwahian mogawas nga mas kulatado si Manny ni Timothy. Kini nga sumada di makalawat sa mga dumadapig ni Manny.

Kay kung sila maoy pabut-on, sayop ang desisyon ug si Manny maoy nidaug. Grabe ang bagulbol diha sa mga imnanan, kan-anan, daplin sa karsada, gym, kabalayan nga nahapnan og tan-aw, kay lagi gitikasan si Manny. Sila nga nagtan-aw pinaagi sa pay-per-view nakakita kung giunsa pagpauwan og kinumo ni Manny. Pulong nila nagkadipudipo si Bradely og panagang unya siya maoy nidaug?

Hinuon, niluwat na og pamahayag si Manny nga iyahang girespeto ang desisyon sa mga huwes. Matod niya, di siya makabasol sa mga huwes sa iyang kapildihan. Isip usa ka athlete, saludo ko ni Manny sa iyang pagpaubos taliwala sakapildihan nga iyang naangkon.

Isip usa ka Filipino wa mausab ang akong pagtan-aw sa katakus og abilidad ni Manny ibabaw sa ring. Ug labaw sa tanan, ang iyang pag-angkon og kapildihan bisan kung ang iyang fans maglisod pagdawat niini, usa ka hiyas nga angay natong ipasigarbo isip Pinoy. Daghang boksidor nga pildero ang di modawat og kapildihan, ang resulta daghan ang naagin human mag-riot sama sa nahitabo di pa dugay didto sa Argentina.

REMATCH

Ang nakita nato dinhi sa Pilipinas ug ang nakita sa judges didto sa Las Vegas, duna bay kalainan? Pangutana sa usa sa mga fan ni Manny sa iyang text message kanako. Ang buot niyang ipasabot, nganong wa nila makit-i ang impresibong labok ni Manny sa first round hangtod sa ikasiyam. Saksi ‘tang tanan nga round 10 hangtod na sa round 12, nakaigo gyud si Bradley, apan di pa igo nga makapapas sa mga kastigo nga iyang nahiagoman sa sayo nga mga round. Asay maayo motabang ta og lobby nga ang rematch anhi sa Pilipinas. Posibli ni. Kining tanan mag-agad sa handler ni Manny sama kang Bob Arum.

Kadyot lang, dunay nangutana kong pilay kitaon ni Arum niadtong awaya, ug pila ang iyang kitaon sa rematch. Ang-ang man og pisos, dolyar gyud.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph