Nadela: Kinahanglang duawon gyud

NAKABISITA na gyud si Presidente Noynoy sa Sugbo. Natapos na ang mga estorya nga way ganang moduaw sa Sugbo si P-Noy. Wa man ko mosakay anang estoryaha kaniadto kay di man gyud mahitabo nga ang usa ka Presidente sa nasod mohikaw sa iyang panahon pagduaw sa usa ka probinsya sama sa Sugbo.

Mao to nga sa dihang nakadawat ko og instruction nga i-cover ang pag-abot ni P-Noy sa Mactan, naningkamot ko nga di mauwahi tungod kay nagplano ko og ambush interview niya nga wa gyud mahitabo. Sa akong pag-abot sa tugpahanan puwerting mingawa.

Daw way dakong tawo nga moabot. Gawas sa dahunog sa mga ayroplano, wa nay laing mabati sa palibot. Ang mga tawo nga nanugat pila ra sab ka pudyot. Sa laktod way daghang seremonyas nga nahitabo sa iyang paghiabot. Gawas lang sa naandan nga lamanohay sa mga dagkong tawo nga misugat kaniya.

HAPSAY

Gahapon dagko kaayo ang mga hulagway ni P-Noy sa mga lokal nga pamantalaan. Nagpakita kini nga wa gyu’y buslot ang iyang pagduaw og maayo nga pagka dumala gikan sa iyang security hangtod na sa taga Presidential Management Staff ug ubang ahensya nga gisangunan sa mga gimbuhaton labot sa iyang pagbisita. Makaingon ta nga hapsay gyud kaayo kay wa may nga estorya nga negatibo labot sa iyang unang byahe sa Sugbo.

Kaniadto man gud sa lain pa ang Presidente, dunay pipila sa iyang secuirty naghubog-hubog, nani-on og taxi driver, nadakpan og mao na hinuon ang dagko kaayo og hulagway sa pamantalaan. Ang Presidente puwerting gamaya sa litrato. Diha sab to’y Presidente nga ang iyang security nasubrahan kay ang atong kauban nga photographer naapiki.

Salamat nga wa ni masinati niadtong Miyerkules ug manghinaot ta nga matag bisita sa Presidente magpabiling tiunay ang iya ng katuyo-an ug way mansa sa mga hiwi nga binuhatan sa iyang mga kuyog.

NPA

News and Public Affairs Night kon NPA karon nga adto manukad sa Baseline Restaurant.

Kini kalihukan sa KBP nga nagsaulog sa Brodkaster’s Month. Ang maong kalihukan giabagan ug gisuportahan sa mga opisyales sa KBP Cebu. Sama sa naandan nagkadaiyang presentasyon ang masaksihan gikan sa mga estasyonan nga sakop sa KBP. Sigurado ko nga kining isyu sa hostage crisis, dengue ug daghan pa, ang hatagan og kinabuhi sa mga presentor. Dagkong ganti sab ang nagpaabot. Buot nakong pasalamatan si Danny Calienta usa ka Josenian sa pagpagamit sa iyang Abbalal Professional Audio Service apil na ang lightings nga matod pa mouyog sa tibuok gabii nga kalihukan. Si agaw Archie Nadela ato sab nga nahangyo nga mopaambit sa iyang Acoustic music.  Manghinaot ko nga ready na ang tanan para karong gabii. Mabuhi ang KBP-CEBU!

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph