Nadela: Manang Rebecca ug ang iyang iro

‘MARIMAR’ ang sikat nga Mexican telenovela pipila na ka tuig ang nakalabay. Mao ni ang pangalan sa iro nga babaye nga gipailaila diri nako didto sa aseras sa Fuente Osmeña rotunda.

Usa ka inahan nga nagpaila sa pangalan nga Rebecca Perez ang akong nailaila nga tag-iya sa iro. Si Rebecca akong nadiskub­rehan kabahin sa daghang linalang nga mangligdas sa aseras sa maong dapit matag gabii ug sa adlawan, mangaykay og basura sa palibot.

Si Rebecca inyong makit-an kanunay nga magsuroy uban sa iyang iro samtang magsambilay sa sako nga gisudlan sa agi sa iyang pagpamasura. Siguro nakakita namo ining Rebecca nga sa kagamay sa iyang kinitaan nakahimo pa siya pagbuhi sa iro nga si ‘Marimar.’

GUGMA

Sa among panag-estorya, giasoy ni Rebecca ang sugilanon sa iyang kinabuhi ug nga mahigugmaon siya sa iro. Matod niya, duna siyay usa ka anak nga wala na sab niya igkita kay gisagop. Ilo na siya sa ginikanan mao nga nag-inusara na lang siya sa pagpanginabuhi. Kay way igsuon o paryente nga masak-an, ang aseras maoy iyang nahimong pinuy-anan. Sa adlawan, mamasura siya ug sa gabii sa aseras siya mopahulay.

Sayod siya kon unsa ka risgo alang sa usa ka babaye sama niya ang magpalabay sa kagabhion diha sa aseras, si Marimar maoy iyang gisaligan nga mobantay niya samtang natulog. Daghan nang higayon nga makamata siya tungod sa pagsige og paghot ni Marimar.

Sama sa uban nga nagbuhi og iro, ang paghot maghatag og signal nga dunay tawo dautan man o dili. Mabalaka gani kadtong kinural ang balay, si Rebecca pa kaha nga naa lang sa aseras.

MASAKITON

Dako man tuod og tabang si Marimar sa panginabuhi ni Rebecca, nahadlok ko nga dili na siya magdugay. Dunay mga samad si Marimar ug puwerte pa gyung niwanga. Dakong

masakiton si Marimar sa akong tan-aw. Siguro sama sa iyang amo kulang sa kaon. Kulang gyud sa alima.

Hangtod nga magpabilin pa si Rebecca ug ang liboan niya ka mga kauban nga nangatug sa aseras, bisan pila pa ka Marimar ang ipuli niya magsakit lang gihapon. Duha ka linalang, ang usa tawo, ang usa iro  nagkina­hanglang mahaw-as gikan sa aseras.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph