SAYOP ang pagtuo nga kong kanus-a saulogon ang Fire Prevention Month mao sab ang isiaw sa alarma sa sunog. Ang sunog ialarma bisan unsang bulana. Dili ni mamili kong dili ta mag-amping ug magpakabana dili ba? Busa tangtanga na sa inyong hunahuna kanang maong pagtuo.
Pangandam
Ang tukma nga pagpangandam maoy numero unong pang alkontra sa sunog. Moingon ka nga layo ra sa sunog ang inyong balay kay bag-o ang wiring sa kurÂyente. Walay nag gamit og LPG sa kusina. Way plantsa nga kuryente.
Walay mga bata nga posibling magdula og posporo. Nindot na. Pero di gihapon ni garantiya nga di mo alarmahan og sunog kay ang inyong mga silingan wala man sab magpakabana. Silay ma-alarmahan ug ang imong balay mapagan.
Parehas ra na sa pagmaneho og sakyanan. Nag-amping ka sa pag-drive aron di mabangga. Unsaon ta man na nga ang ubang dryaber wala man mag-amping ikaw ang gibanggaan. Mao nga makaingon ko nga kining kampanya pagbatok sa sunog hiniusa ni nga pakigbisog. Ang tanang lumolupyo sa usa ka dapit magtambayayong. Maghiusa dili magbinagsa.
Drill
Usa sa lig-on nga paagi unsaon pagtibuok sa puwersa pag-alkontra sa sunog mao ang fire drill. Himuon unta ni nga mandatory sa Bureau of Fire Protection (BFP) sa mga sityo. Ang taga BFP mopasiugda ini tibuok tuig dili kay matag Marso lang kay lage nagsaulog og Fire Prevention Month. Ang mga bombero makig-alayon sa taga barangay ug unahon ang mga interior nga bahin nga di maagian og fire truck.
Mandatory
Ang taga barangay mohimo ini nga mandatory sa matag miyembro sa pamilya. Wala man siguroy mapriso kay di moapil apan ang barangay mahimong maningil sa dili moapil pinaagi sa pagbalibad sa mga transaksyon ining mga tawhana.
Pananglit mangayo sila og barangay clearance, unyag tan-aw sa computer mapalgan nga wala moapil sa fire drill balibaran ug pasabton. Balibaran sab kadtong molukat og sidula nga wala makaapil sa fire dril. Bisan unsa nga transaksyon sa barangay mahimong maapiki ang wala sa listahan nga nakaapil sa fire drill. Pero kinahanglan ipasabot ning daan sa dili pa ipatuman ang fire drill. Kinsa may moreklamo nga para man na sa ilang kaayohan.
Ilakip na diha sa fire drill nga ang pagpangawat og kuryente usa ka dakong sala og usa ni sa nag-unang hinungdan sa alarma sa sunog. Tibuok tuig ni nga programa sa barangay ug BFP. Kini maoy hinumduman natong tanan ang alarma sa sunog mas dako pa og kadaut sa bagyong Yolanda o sa 7.2 magnitude nga linog kong magkulang ta sa pagpakabana. Sa bagyong Yolanda ug linog may napupho pa man nga dapat sa balay ang mga biktima. Sa sunog ang inutang nimong balay og appliances lamyon sa kayo.