Nadela: Mas maayong mosubra kay sa magkulang

BISAN unsa nga matang sa pagpangandam mas maayo nga daghan kita og gihimo kay sa kulang.  Mao ni unod sa usa ka sinulat nga akong nabasahan. Haum kaayo ni sa gihimo nga pagpangandam sa pag-agi sa bagyong Ruby.

KOMUNIKASYON

Wa kaayo ko mabalaka sa ubang panginahanglanon para sa bagyo. Ang akong gikabalak-an mao ang aspeto sa komunikasyon . Basi sa kasinatian ni Yolanda dul-an sa usa ka  semana  nga nabuwag ang isla sa Bantayan gikan sa mainland Cebu human naputol ang linya sa komunikasyon.  Manghinaot ta nga di na kini masubli ug mapangitaan ug permaninting solusyon.

Asa man mo nahimutang karong orasa mga panghinaot nga dili mo lisod kontakon  sa inyong mga minahal sa kinabuhi. Panahon gud sa kalamidad kining komunikasyon maoy labing importante labi na sa oras nga nanginahanglan kita ug tabang.

REKOREDA

Ang laing sugyot mao ang pag-agni sa mga barangay nga naghimo ug mga rekoreda diha sa mga hilit nga dapit pagpahibawo sa mga molupyo sa pinakauwahing lakat sa panahon. Sa ingon nga paagi mapakalma kadtong nagbaton og kahadlok o kabalaka. Usa sab ni sa mga paagi nga derikta nga maka lambigit ang barangay sa katawhan.

MAHUSAY

Mas maayo pang gibagyo kay sa masunogan. Mao ni akong nabati nga komento gikan sa mga biktima sa sunog sa Sityo Mahusay sakop sa Barangay Subangdako, Mandaue City. Ang maong sityo nasunog niadtong Huwebes sa hapon. Nubenta y sais ka pamilya ang nawad-an sa ilang panimalay.

Si Leizl Zapa nitug-an tapot senina ra gyud ang gibilin sa sunog kay naatol nga nag-duty siya. Dobli ang kaguol ang iyang gibati ilabi na kay may gihambin sab siya nga balatian. Siya nipuno sad nga maayo pa nga gidemolis nalang ang ilang balay kay sa masunog. Gihugonhugon man gud ang usa ka demolisyon nga ipatuman sa maong dapit.

Si Judymae de Cello tinun-an sa kolihiyo akong naabtan nga nanguykoy sa mga salinsalin sa sunog. Ang iyang gipangita mao ang iyang mga medalya nga naapil ug kasunog. Si Judymae nga sakop kaniadto sa Team Cebu City sa sport nga arnis nakatigom ug 26 ka medalya nga maisip nga nindot nga handumanan sa iyang pagpasingot.

Ang sunog niadtong Huweves takulahaw lang ni­lamoy sa iyang mga hinaguan. Hinuon duna nay dul-an sa 10 ang iyang nakoykoy apan wa na mahitsura. Gawas kang Judymae ang ubang nasunugan namasin sab nga duna pa silay mahipos ilabi na niadtong mga kabilin gikan sa katigulangan.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph