Nadela: Si John kenneth ug ang CCMC

AKONG higala tawgon ta lang sa pangalan nga James Spider nitawag kanako sa miaging semana aron ipahibalo ang gamayng kasikas sud sa Cebu City Medical Center (CCMC).

Sa akong pakisusi, bata diay nga gipakatawo sud sa pansayan sa maong tambalanan. Nahibulong siya nganong nahitabo ni nga unta naa naman sa sud sa tambalanan ang inahan, og nganong adto pa manganak sa CR. Sa akong pagsubay sa nahitabo mao ni ang akong nasayran.

Ang iyang mama nga si Amor Leah manganakay na gyud diay sa maong petsa, galing lang kinahanglan pa siya mohulat og tukma nga oras mao nga gipahulat siya sa doktor sa gawas sa delivery room.

Naunsa nga nakahunahuna man siya sa pagkanaug sa ground floor diin nahimutang ang CR aron maligo, ang sunod nga hitabo siya nakaanak og usa ka himsog nga batang lalaki.

Gipasabot ni Dr. Gloria Duterte, direktor sa CCMC nga dili unta kadto mahitabo kong si Amor nituman pa sa gimando kaniya sa doktor. Hinuon gipasalig sa staff ni Dr. Duterte nga way kakulian ang panglawas sa bata bisan kong wala sa delivery room siya gipanganak. Matod sa amahan nga si Gilbert hinganlan nila og ‘John Kenneth’ ang bata.

GUBAT

Human sa pagpanghasi sa nilabayng mga bagyo, laing bagyo ang atong giatubang ilabi na didto sa Mindanao. Mao ni ang bagyo sa seguridad sa atong kaigsunan didto sa Mindanao.

Di lalim ang kagul-anan nga gibati sa mga pamilya niadtong mga sundalo nga sa uwahing ihap subra na gyud sa baynte ka buok ang nakalas sud lang sa duha ngadto sa tulo ka adlaw didto sa Basilan. Dili hangin kon dili bagyo sa nangpungasi nga mga bala. Bagyo sa kahadlok og kabalisa. Labaw sa tanan, bagyo sa nagkadaiyang opinion unsaon pagsulbad kining maong problema.

Akong higala nga akong gikauban gahapon, subling nipasabot nga kadtong iyang sugyot kaniadto angayan gihapon nga hatagan og pagtagad kong gusto kita og kasulbaran sa problema sa Mindanao. Klaro nga pagpatuman sa gun ban. Mao ni ang iyang gibalik balik pagsulti kaniadto ug mao ra gihapon kini ang iyang gipasabot gahapon.

Sa ato, kon ang gobyerno seryuso nga mogukod niadtong naghupot og illegal nga armas.

Di ba ang kagubot mahimo man untang estoryahon apan kay armado, kadtong malupig sa katarungan modayon og dangop sa armas. Kon way armas nga mahikap, unsaon man pagbanaw sa dugo.

Akong gisuportahan ang maong sugyot di lang didto sa Mindanao. Bisan asang suok sa nasod problema kaayo ang paglatagaw sa mga tawo nga armado nga unta wa man sila hatagi og katungod nga maghupot.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph