Nadela: Trabaho sa tingbakasyon

DAGHAN na ang nagpa-book alang sa taas nga bakasyon. Ang uban nakalarga naman gani. Ang uban way plano kay way budget. May budget man tuod ang uban apan di sab ka larga kay dunay mga kabilinggan. Usa sa mga rason kay mo-enroll og summer programs ang ilang mga anak. Ang uban dunay apilan nga voice lesson. Ang  uban magpa-enroll og mga sports program sama sa swimming, basketball, karate, arnis, judo ug daghan pa. Duna say gustong mag-ballet ug dance sports. Alang ni sa mga tubod tuburan.

Ang kadaghanan ug mao ni angay nga bantayan og maayo sa mga ginikanan, ang mga naadik sa kompyuteran. Ambot og nganong di makontrol sa ubang ginikanan ang ilang mga anak nga nayabag og maayo sa internet. Nganong gipasagdaan? Pasabot ba nga nagkaway tahod sa ginikanan ang kabataan nato karon? O, kulang lang sa disiplina ang ilang mga anak?

Didto sa bukid, daghan nakong nakita nga mga anak nga nitabang sa ilang ginikanan sa mga gimbuhaton sa balay ug sa umahan. Ang uban nitabang og daro, pangupras, pagkuha og ubod sa saging aron ilawog sa baboy, nangu­ha og kumpay aron ilawog sa baka ug kabayo. Kay wala may daruhon diri sa siyudad naglaom ta nga hatagan og tarya sa mga ginikanan ang ilang mga anak. Bisan unsa nga kurikurion diha sa balay aron mahimong mabungahon kining panahon sa tingbakasyon.

Kon duna moy paryente nga naay negosyo ipasud og trabaho. Mao ni gibuhat sa akong papa og mama niadtong panahon nga nagtungha pa ko sa kolehiyo. Imbes nga mobakasyon akong gitutukan ang daghan kaayong trabahoon sa pandayan og puthaw sa akong lola diha sa JM Basa duol sa Taboan. Nakat-on ko unsaon pag-wel­ding, paghimo og birha, labaw sa tanan nakat-on ko unsaon paghimo og daro. Akong gipasabot kanang daro nga giguyod sa kabaw.

Labing lisod kanang gitawag og punta, sapatos, patindog, kabayo, lipya ug liboy. Grabeng pasi­ngot ang maong matang sa trabaho kay pulos mano mano. Dako ang akong pasalamat sa akong lola nga naghatagan sab nako og allowance human sa tibuok adlaw nga pasingot.

NAHAGBONG

Kining summer dili maayong mokompiyansa ang mga ginikanan. Basin kon nahadlok nga motug-an ang inyong mga anak nga hagbong sila sa usa o duha ka subject. Mao sab ni ang panahon nga mokuha og summer class ang nahagbong ninyo nga anak. Kon duna moy duda bisitai ang ilang eskwelahan. Ayaw paglangay kay daghan na kaayong kaso nga gilimod sa anak nga siya nahagbong. 

Ug sa katapusan pahimusli ang summer job nga gitunol sa gobyerno. Agniha ang inyong anak pagpalista og pagpangaplay. Mas nindot kon mag- anad-anad sa pagpangita og trabaho.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph