Nadela: Unsay sala sa taga Candulawan

PAGKALOOY. Mao ni una nakong na­litok human nako masud-ong ang pamayhon sa mga ginikanan nga nag brigada eskwela sa dapit diin naugdaw ang ilang eskuwelahan sa Candulawan Elementary School sa ciudad sa Talisay. Ilang gitabangan og pupho ang mga salin sa sunog. Giandam nila ang maong dapit sa pamasin nga dunay malooy pagtukod og bag-ong school building hulip sa nasunog. Nahitabo ni sa niaging Martes usa ka adlaw human nga gilusad ang tinuig nga Brigada Eskuwela sa tibuok nasod. Nahuman-human na ang ubang eskwelahan sa ilang mga ginbuhaton, apan ang taga Candulawan Elementary School kutob ra gyud sa paghipos sa abo sa nasunog nilang eskuwelahan niadtong Marso 23.

CLASSROOMS

Akong nahinabi si Maam Mariam Bacalso, ang ilang principal ug iyang gitug-an nako nga ang co­vered court sa barangay maoy ilang gamiton isip kasamtangan nga classroom. Unom ka classroom ang isigo sa tibuok covered court. Si Kapitan Virgilio Bacalso nitug-an nga laing duha ka classroom ang ilang ipuno. Moabot sa walo ka classroom tanan ang magsikit. Mao nga akong giingnan si Kapitan nga siguradong di makatuhog ang mga bata sa ilang liksyon kay ang bongbong nga plywood di makasagang sa kasaba nga mamugna. Pun-an pa sa kasaba sa tambotso sa mga habal-habal nga magsubida sa kilid sa co­vered court. Di pa ni mao. Ang salibo nga mosud ug ambot og maantos ba ni sa mga bata. Si Mariz Abadiez tinun-an sa Grade V nisulti nako nga iya nalang antoson.

ASPALTO

Nagtan-aw ko sa gihimo sa taga DPWH sa atong kadalanan ilabi na sa dakbayan sa Sugbo naka pangutana ko nganong giuna man ning karsadaha nga maayo pa man? Nganong wa man unaha ang problema sa Candulawan? Pagka­yabag huna-hunaon. Kanang karsada makapaabot pa na. Ang Edukasyon sa mga bata sa Candulawan ug sa ubang dapit nga nagproblema ug mga classroom mao unta ang gihatagan ug prayoridad sa atong kagamhanan.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph