Nag-ilog sa babaye, 1 patay

PATAY ang usa ka lalaki human gipusil sa lalaki nga dunay deperinsya sa panglawas niadtong Domingo mga alas 1:50 sa hapon sa Purok 4B, Gusa ning siyudad sa Cagayan de Oro.

Si Police Officer 2 Analisa Pading sa Police Station 3 (PS3) sa Agora nga nahinabi sa Sun.Star Superbalita niingon nga nahitabo ang insidente sulod mismo sa puloy-anan sa suspetsado nga mao si Michael Arnado, 23.

Nasayran nga adunay uyab si Arnado nga mao si Rose Villadungog, 19, taga-Lapasan ning siyudad kinsa niadtong tungora niadto sa puloy-anan ni Arnado, apan gipasabot ni Arnado nga aduna siyay kauban nga laing lalaki nga giingong uyab usab niini nga giilang si Peter Espadero, 20, taga-Baungon, Bukidnon.

Gani sa wala pa ang insidente, unang nagbikil si Arnado ug Espadero pinaagi sa mga text messages tungod kay mipasabot usab si Espadero nga nauyab na niini si Villadungog.

Si Arnado nipasabot usab nga una niyang nauyab ang dalaga gani moabot na sa duha ka tuig ilang relasyon bisan paman adunay deperensya sa iyang tiil og magamit lamang og wheelchair.

Atol sa insidente, miuban si Espadero kang Villadungog ngadto sa puloy-anan ni Arnado kay kuhaon lamang niini ang USB nga gihuptan sa uyab.

Gisaysay ni Arnado nga nagsige og ingon ang dalaga nga gisundan kini ni Espadero hinungdan nakaabot sa puloy-anan ni Arnado.

Gisita ni Arnado si Espadero kung nganong nakaabot sa ilang puloy-anan, apan igo lamang mikatawa si Espadero ug niingon nga iyang uyab ang dalaga ug iyang giubanan. Gibutyag ni Arnado nga si Villadungog miangkon atubangan kaniya nga tinuod nga iyang nauyab na si Espadero.

Gibati usab og kalagot si Arnado sa pagtuo nga gi-underestimate niini ang iyang kahimtang labina aduna man kini deperensya. Nagbikil sa estorya ang duha ka mga lalaki.

Nisulod sa lawak si Arnado ug gikuha ang gitagoan nga pistola.

Nihimo sa warning shot si Arnado aron molakaw na si Espadero, apan gusto niining bawion ang pistola nga gihuptan hinungdan nga gipusil ni Arnado nga miresulta sa pagkaigo sa dughan niini ug paa nga bahin. Gidala pa sa Maria Reyna Hospital, apan dead on arrival gideklarar sa doctor si Espadero.

Si Villadungog nga gihinabi sa kapolisan mihimakak nga iyang uyab si Espadero ug giingong bag-o lamang niining nakaila ug magsige og sunod-sunod kaniya kay adunay gusto kaniya.

Apan basi sa pamahayag sa suspek nga si Arnado gibutyag niini nga miangkon ang dalaga nga uyab na niini si Espadero, apan bag-ohay pa lamang sukad niini naila. Gani atol sa insidente gikan pa nga nagsimba ang dalaga.

Boluntaryong mitahan sa Police Station 3 si Arnado ug gibalhog na ning panahona sa Maharlika Detention Cell, samtang si Rose apil sa gipriso, apan si Arnado nipasabot sa mga polis nga siya ang nipatay kang Espadero ug walay labot ang dalaga hinungdan nakagawas ra usab kini sa prisuhan.

Anaa sa kostudya sa mga polis si Villadungog kinsa maoy witness sa hitabo. Apil sa giimbestigahan sa mga polis ang wala pa matinong pistola nga gigamit sa suspek sa pagpatay tungod kay giingong gipanag-iyahan kini sa amahan niining usa ka bodygurad.

Gikatakdang imbestigahan ang amahan sa suspek human hangtod sa pagsulat ning balita, wala pay gikapakita ang gigamit nga pistola nga posibleng gitagoan.

Sa laing bahin ang amahan sa namatay nga si Espadero subo ug nakahilak sa hitabo ug nanawagan sa iyang mga paryente nga bisitahon ang iyang anak.

Wala usab kini nasayod nga nahigugma iyang anak ug namatikdan lang nga magsige og balik suroy ning siyudad. (Stephanie V. Berganio)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph