Nagbukal ang tubig daplin sa dagat sa Dumanjug

HUMAN nihulpa ang yuta sa usa ka barangay sa lungsod sa Dumanjug niadtong milabay nga semana, may duha ka mga dapit na usab sa laing barangay nga daplin sa dagat nga may tubod sa nagbukal nga tubig.

Ila kining gituohang epekto na usab sa linog niadtong Pebrero 6.

Kini ang gitug-an ni Dumanjug Mayor Nelson Garcia sa Sun.Star SuperBalita kagahapon human masusi ang Barangay Camboang sa mga sakop sa Mines and Geosciences Bureau (MGB) tungod sa padayong paghulpa sa yuta sa dapit.

Matod ni Garcia nga gipahibawo siya sa iyang tourism officer kagahapon nga dunay duha ka mga dapit sa Barangay Looc nga daplin sa dagat nga adunay tubod sa tubig nga nagbukal.

Niadtong Dominggo giingong nabantayan sa mga tawo sa dapit ang nagbukal nga tubod.

Nitataw ang mayor nga pwerting inita sa tubig apan makit-an lang kini sa higayon nga maghunas ang dagat. Iyang gitumbok nga anaa kini mahimutang sa atbang sa Yuan Beach Resort nga naila usab nga kaliguanan sa ilang lungsod.

Subay niini, nagtinguha si Garcia nga mohangyo sa Philippine Institute of Volcanology and Seismology (Phivolcs)-Central Visayas aron masusi ning nagbukal nga tubod nga anaa sa baybayon sa Barangay Looc.

Kabahin sa nahulpang yuta sa Camboang, nipahibawo si Garcia nga gisusi na kini sa mga sakop sa MGB apan nitumbok siyang ang ilang obserbasyon sama ra usab sa obserbasyon niadtong mga nakakita sa dapit.

Ang mayor nipasabot nga ang MGB di makahatag og konkreto nga rekomendasyon kon unsay buhaton sa nahulpa nga dapit kay wa silay mga kahimanan nga magamit aron masusi kini.

Gihulagway niya ang nihulpang yuta nga daw sama na sa imbudo karon ang porma unya may tubig na ang tunga.

Giingnan siya sa MGB nga makig-coordinate sila sa usa ka private company nagdto sa Manila aron tabangan sila nga mapahigayon ang “x-ray” sa dapit.

Si Garcia nipadayag nga gusto niya ug sa mga lumolupyo sa Dumanjug nga masuta kon unsa kalawom ug kalapad ang bangag sa ilawom nga bahin sa nahulpang yuta.

Niini, namahayag siya nga maghuwat lang sila sa aksyon sa MGB hangtod ilang masayran kon unsa gyod ang hinungdan sa pagkahulpa sa dapit.

Sa pagkakaron, padayon ang iyang kamanduan nga di makasud ang mga tawo sa dapit busa may mga barangay tanod ug mga sakop sa kapulisan nga nagbantay niini.

Niadtong Pebrero 17, nihulpa ang pribadong luna sa Camboang apan ang MGB nipasabot nga sa bisan asang dapit sa Sugbo makatagamtam sa paghulpa sa yuta kon “sinkhole” kay giso man ang kasagarang klase sa atong mga yuta nganhi.

Ang MGB nihimog rapid geohazard assessment sa mga lugar nga kuyaw sa pagdahili sa yuta ug pagbaha niadtong 2009. Ang team sa mga geologists nakabantay og presensiya sa mga sinkholes sa 14 ka mga barangay sa lalawigan sa Sugbo.

Sa maong gidaghanon, 13 ka mga barangay ang nahimutang sa lungsod sa Tuburan nga naglakip sa Bulwang, Lusong, Montealegre, Santo Niño, Siotes, Kabkaban, Libo, Taminjiao, Kalangahan, Bagasawe ug Sandayong.

Ang laing mga sinkhole nahimutang sa Barangay Linut-od sa lungsod sa Argao, Kang-actol sa Dumanjug ug Barangay Vive sa Ronda. (Sun.Star SuperBalita Cebu)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph