Nagpatay sa pari gipadala na sa Northern Samar

DAVAO DEL SUR - Gipadala na sa Northern Samar ang nag-unang suspek sa pagpatay sa usa ka pari niadtong tuig 2009 human nasikop niadtong Pebrero 12 ning tuiga didto sa lungsod sa Sta. Cruz.

Gipadala sa kapulisan mao ang most wanted nga si Jerry Espera kinsa nasikop human mi-aplay pagka-body guard ni Mayor Joel Ray Lopez.

Si Espera kanhi sundalo didto sa Mondragon, Northern Samar nagtago sa lungsod sa Sta. Cruz aron di masikop sa mga otoridad.

Sa pagpangaplay ni Espera, gipasusi dayon sa mayor ang pagkatawo ni Espera kinsa nagpailang paryente sa mga Lopez.

Base sa resume ni Espera, gigamit niyang pangalan mao ang Jerry Dumasig Espera.

"He wanted to be my bodyguard and told me about his background as a soldier," suma sa mayor sa SuperBalita.

Daan nang nakadawat og taho ang mayor gikan sa 39th Infantry Battalion nga kadudahan ang lihok sa suspek mao nga iyang gipa-scan ang hulagway niini ug gi-email sa kapulisan didto sa Northern Samar.

Gikompirma sa Northern Samar Police Office nga si Espera mao ang nagpatay ni Fr. Cecelio Lucero pasado alas 8:00 sa buntag niadtong Septembre 6, 2009.

Si Lucero, igsuon ni kanhi Congressman Wilmar Lucero, nagmaneho sa iyang kotse dihang gibanhigan sa mga armado didto sa Barangay Layuhan, lungsod sa San Jose, Northern Samar.

Si Espera maoy usa sa 30 ka mga armado nga namanhig sa pari niadtong higayona.

Gisulti ni Police Senior Inspector Alfredo Santillana, hepe sa kapulisan, nga si Espera nag-atubang usab og kasong kidnapping ug rape didto sa ilang lugar.

Gikatahong aktibo ang pari sa kampanya batok paglapas sa tawhanong katungod didto sa ilang lugar mao nga gipatay siya. (Orlando B. Dinoy)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph