BANSALAN, Davao del Sur - Tungod sa selos, patay nang miabot sa balay tambalanan ang usa ka laborer human giluba sa gikaaway didto sa Maglangit Compound sa Barangay Poblacion Dos sa alas 10:15 sa buntag, Biyernes.
Ang biktima giila ni Chief Insp. Jeffrey Latayada, hepe sa Bansalan Police Station nga si Enrique Vicente Lizada, 40, molupyo sa Barangay Linawan sa lugar.
Giila sab ni Latayada ang suspek nga si Charlie Aton Carticiano, 26, ulitawo ug molupyo sa dalang del Pilar sa lugar.
Nahiagom ang biktima og samad dinunggaban sa tuong bahin sa dughan hinungdan sa iyang kamatayon una miabot sa Viacrusis Hospital sa lungsod.
Ang suspek nga si Charlie nahiagom sab og samad sa walang bahin sa kamot ug nadala sa laing bay tambalanan sa lugar.
Gibutyag sa inahan sa suspek nga love triangle ang nag-unang motibo sa krimen.
"Amo nang gihikay ang pagpasaka og kaso, naa pa man sa ospital ning suspek pero gipabantayan na nato sa atong mga sakop," panapos ni Latayada. (Orlando B. Dinoy)