Nakorner nangluba sa 2 tawo

DAVAO DEL NORTE -- Gipangita na sa kapulisan ang usa ka lalaki human nanunggab og duha niya ka mga silingan sa alas 6:17 sa buntag kagahapon didto sa Purok 2, Nueva Fuerza, Tagum City.

Sumala pa nga bangi sa dula sa bilyar ang hinungdan aron nga dunggabon ni Alberto "Toldo" Ladaran, 52, molupyo sa maong lugar sila si Melaquen Tacastacas Ramos, 39, mag-uuma ug silingang si Adriano Vergara Maitim Jr., 37, trabahante ug molupyo sa Purok 1 sa maong lugar.

Sa inisyal nga taho nga nakalap sa Tagum City Police Station, nasayran nga niadtong Huwebes lang nagsugod ang away sa mga nahisgutan kon diin nakalalis sa suspek si Raden Ramos, igsuon ni Melquen ug barkada ni Maitim.

Sumala pa nga nagkalalis ang mga nahisgutan atol sa dula sa bilyar nila sa suspek nga miresulta sa hitabo.

Gikanayon nga sa maong adlaw, misung matud pa ang mga biktima ngadto sa suspek nga milikay unta kanila.

Apan dihang nakorner na, kalit matud pa nga gipagawas niini ang iyang "butchers knife" ug way pagpanuko nga giatubang ang duruha.

Samad sa tuong kamot nga milapos sa ilok ug samad sa likod ang natagamtam ni Ramos samtang daghang samad dinunggaban sa tiyan, wala nga kamot, likod ug wala nga bahin sa dughan si Maitim.

Gilayong mikagiw ang suspek padung sa sikbit nga barangay sa Tagum samtang anaa sa balay tambalanan ang mga biktima.

Atol sa pagsulat ning balita, padayon pang gipangita sa kapulisan ang suspek. (Domilyn R. Pico)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph