Nalzaro: Abagan ang kapulisan

NATURAL, bisan naman og akoy mayor, moulbo gyud ang akong kaspa niining nahitabo nga sunod-sunod nga kaso karon sa papamatay ug pagpamusil. Kini gong krimen usa kini sa makapa-islag sa mga negosyante ug ingon man mga turista. Kon ikaw usa ka negosyante, magpanagana ka nga mobubu og puhunan sa usa ka gubot nga lugar. Mao bitaw nang Mindanao labi pa kanang mga lugar nga gihugpaan og kagubot sama sa pagpamomba ug kidnapping, wala kaayo molambo ang patigayon. Ang mga turista labi pa ang mga langyaw, mahadlok usab.

Miulbo ang kaspa ni Mayor Michael Rama gumikan sa sunod-sunod nga pagpatay labi pa kining nahitabo nga drive-by-shooting og kadtong pagpusil patay sa usa ka police asset ug sa sakop sa Barangay Intelligence Network (BIN). Gani iya mang gipahulipan ang hepe sa Carbon Police Station gumikan kay wala dayon makaresponde sa maong mga hitabo nga duol ra sa iyang hurisdiksiyon. Matod pa sa mayor nga nagmika ang mga pulis. Nangutana ang mayor kon asa na ang mga motorcycle riding cops?

MAKAPA-ALARMA NA

Makapa-alarma na tuod kining nahitabo karon labi pa kining drive-by-shooting. Dili ni pareho sa pagtumaw sa vigilantes niadtong 2004, gumikan kay kadtong vigilantes aduna man kadtoy specific nga target. Ang mga target niadto mao ang mga badlungon sa katilingban. Busa og kita mga mabuot nga lungsuranon, dili kita angayan mahadlok. Aw, hinoon, kuyaw lang og mapiskan ta. Kapin sa usa ka gatus ka mga tawo nga adunay criminal records ang napatay sa vigilantes.

Kining pagpamatay nga bunga sa personal nga kasungian, wala usab kitay ika-alarma gumikan kay personal man ang motibo. Pero kining mga pagpanulis o holdup nga patyon pa ang mga biktima kon mopakita og pagsukol, mao usab kini ang kuyaw og makapa-alarma na.

Ug kining away-away sa mga gang. Dili unta paabuton sa atong kapulisan nga moabot ang panahon nga ang mga tawo mahadlok nang mona-og sa ilang pinuy-anan gumikan sa mga kriminal. Gikinahanglan nga sumpoon sa labing madaling panahon.

KOMUNIDAD

Hinoon, kining pagsulbad sa kriminalidad, dili lang usab trabaho sa atong kapulisan.

Maayo lang kon maaktuhan sa atong kapulisan ang usa ka krimen og madakpan diha-diha dayon ang suspetsado. Dako usab og partisipasyon niini ang komunidad o ang publiko.

Unsa-on man pagkuha og mga saksi sa mga imbestigador kon walay tawo nga buot mosaksi?

Walay magamit nga ebidensiya ang kapulisan pagpasaka og kaso sa piskaliya kon walay saksi. Mao nang sa ubang mga kaso karon, wala pay kalambuan sa habig sa kapulisan kay wala man silay nakuha nga saksi. Puro ambot man tanan ang nakakita. Mao nay nakapait.

Busa atong abagan ang kapulisan aron daling masulbad ang usa ka krimen.

(bobby.nalzaro@yahoo.com)

Related Stories

No stories found.
SunStar Publishing Inc.
www.sunstar.com.ph