Nalzaro: Cancer issue way hinungdan

PORBIDA ning atong duha ka mga mayoralty aspirants nga sila si Mayor Mike Rama ug south district Rep. Tomas Osmeña. Mora man og mga bata.

Ang duha nagbinayloay og mga akusasyon kabahin sa kahimtang sa ilang pang­lawas. Ang kampo sa Team Rama mi-akusar nga mibalik ang sakit nga cancer of the bladder ni Tomas hinungdan nga mi-adto kini sa Houston, Texas aron magpa-medical check up bisan kon dili pa panahon.

Nagkaluya na kuno ang panglawas ni Tomas kay mibalik og inum. Hard liquor ra ba gyud ang imnun aning Tomas.

Ang kampo sab ni Tomas wala magpa-alkanse kay mi-akusar sab ngadto ni Mike nga adunay prostate cancer. Kining prostate cancer ra ba, base sa among nahibaw-an ang usa sa mga hinungdan niini nga under-used o overused. Ambot kinsay atong angayan nga pangutan-on niini. Kay matod pa aduna kunoy waiter sa usa ka hotel nga nakakita nga gi-examine si Mike og usa ka doktor sa maong hotel og mao nay sinugdanan sa tabi-tabi.

Ambot kon angayan ba kaha kining tuhuan nga wala may klarong tinubdan sa inpormasyon. Nganong adto man sab magpa-check up si Mike sa hotel? Nganong dili man sa hospital?

KINSAY TINUOD?

Kanang cancer ni Tomas tinuod na. Nahibaw-an naman nato nga na-operahan na siya sa gawas sa nasud. Ang pangutana kon mibalik ba gumikan sa iyang bisyo, mao nay klaruhon.

Ug ang iyang doktor ra maoy nasayod niana. Atong huwaton inig balik ni Tomas kon unsa ang iyang dalang balita kabahin sa iyang panglawas.

Pero matinuod man nga mibalik o wala, dili anga­yan kining gamiton sa Team Rama nga isyo. Kay morag mahulog ra ni nga ilang gitunglo si Tomas.

Morag ilang gi-ingnan ang mga botante nga ayaw mog butar ni Tomas kay hapit na kana mamatay. Para nako dili baya na maayo. Kay posibling adto mosimpatiya ang katawhan kang Tomas. Emotional ra ba kitang mga Filipino. Akong tambag sa kampo ni Mike nga dili gyud nila padak-on kining maong isyo kay mobanda kini nila pagbalik. Dili maayo nga ilang bugal-bugalan ang panglawas ni Tomas. Sa pikas nga bahin, kining isyo nila batok ni Mike, wala usab kini klarong tinubdan. Maayo unta kon ang kampo ni Tomas maka-produce og credible nga testimonya ug dili kay tumo-tumo lang.

Wala gyud ni klaro. Mao ni giingon nga kuwentong barbero.

Kon mao man gani kini ang isyo nga gamiton sa isig ka kampo panahon sa kampaniya, maayo pay boykotan ni sila sa mga botante. Walay makuha ang lungsod niini. Kon ang nagpasiugda niini mao ang mga public relations sa duha ka kampo maayo pay hununong ni nila. Kining atong mga politiko himoon unta nila nga high level ang kampaniya ug likayan ang personal. yud ma-matured ang atong mga politiko.

(bobby.nalzaro@yahoo.com)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph