Nalzaro: Mibiya na sa Romano Katoliko

MIREKLAMO sa media ang anak ni Felimon Borden, usa ka taxi driver nga gipapatay, gumikan kay wala misahe ang patay’ng lawas niini sa duha ka mga simbahan sa Romano Katoliko dihang gikatakda na unta kining i-lubong niadtong Hulyo 27.

Matod pa sa report sa The Freeman diin unang miduol si Cristy Canete, anak ni Borden, nga gibalibaran sila sa St. Therese Parish sa Lahug ug ingon man sa St. Jude chapel sulod sa Central Command gumikan kay sakop matod pa sa “kulto” ang iyang amahan.

Naka-schedule na unta nilang ilubong ang iyang amahan niadtong Hulyo 27, apan gibalibaran sila og gani gi-uli ang ilang pasiunang bayad. Si Borden nga taga sitio Panabang, Apas sakop sa Apostolic Catholic nga gipanguluhan sa gitawag nga “Monsinyor” Modesto Delcino.

Kini si Delcino dili gyud monsinyor sa Romano Katoliko kon dili nagtudlo-tudlo lang sa iyang kaugali­ngon nga monsinyor.

NABUAK

Sa sitio Panabang sa Barangay Apas nabuak ang grupo diha. Kaniadto usa ra ang ilang pista isip pahinungod sa ilang patron ang Inahan sa Kanunay’ng Panabang matag ika-upat nga Domingo sa Hunyo. Kanunay ko nga mamista diha sa ilang Apas councilor ug dySS Super Radyo reporter Allan Majait. Apan karong tuiga nabuak ang organisasyon sa ilang kapilya diha gumikan kay kini si Delcino nagtukod anang iyang Apostolic Catholic ug iyang sumosunod kini si Borden.

Gani si Ombudsman graft investigator Alejandro Borden morag pari naman niining maong grupo. Apan ang ilang tinuohan morag nagsunod gihapon sa Romano Katoliko kay motuo man gihapon sila og mga santos. Apan ang momisa nila mao kana si Delcino ug dili pari gyud sa simbahan. Mao kana ang hinungdan nganong wala momisa ang taga simbahan sa patay’ng lawas ni Borden. Ilang gi-usab ilang pista.

PABALIKON

Si Fr. Ed Cabug sa St. Therese maoy gitahasan sa parokya nga mo-mediate sa duha ka grupo aron magkahi-usa sila pagbalik. Pagbalikon sila sa pagsimba sa Romano Katoliko.

Apan ang grupo ni Delcino nagdumili kay matod pa nila nahiluna ug malinawon na sila sa ilang tinuohan. Gani atol sa ilang pista lain man nga pari ang nagmisa.

Busa kon buot natong analisahon o sabton, dili na gyud ba sila Katoliko. Adto sila magpamisa sa ilang tinuohan. Hinuon, nalubong na si Borden gahapon ug si Delcina ang nagmisa. Naa ra man diay na.

(bobby.nalzaro@yahoo.com)

Related Stories

No stories found.
SunStar Publishing Inc.
www.sunstar.com.ph