Nalzaro: Pasayloon ug kaloy-on

BISAN wala ako makakita kaniya ug makahinabi personal apan akong na-obserbahan nga maayo ang paminsar ni Jecy Mollena, ang 20 anyos nga lalake nga nakapa-ukay sa mga Sugbo-anon human kini mikatkat sa tower sa Marcelo Fernan Bridge. Gawas pa, aduna siyay igong talent sa pagkanta. Ang nakanindot ra ba kay ang iyang kanta usa sa akong paboritong kantahon ang ‘Bakit ngayon ka lang’ ni Ogie Alcasid.

Sa iyang pagpanubag sa halos nakong usa ka oras nga interview kaniya sa akong tulumanon sa DYSS Super Radyo, maayo man ang iyang tinubagan. Hinuon, usahay dili lang siya consistent. Di man sab hinuon molikoy. Mas milikoy pa si Mayor Ricky Ramirez sa Medellin sa dihang akong siyang nahinabi kabahin niadtong kamatayon sa iyang bodyguard nga si Edelberto Abao. Lagyo kaayo ug lihay si Mayor Ramirez sa akong mga pangutana.

PASMO/ADIK

Maka-ingon ta nga dili tarong ang paminsar sa usa ka tawo nga mosaka sa tumoy sa taytayan. Wala man pod kuno siyay plano nga maghikog sama sa gihimo niadtong babaye nga unang milayat sa unang taytayan sa Mactan. Duna lang kunoy gustong mopatay niya.

Ang iya lang tuyo nga misaka siya didto kay naghuwat siya og barko nga mo-agi aron adto siya mo-ambak sa barko kay gusto niyang adtuon ang iyang inahan nga atoa sa Bukidnon. Buwag na ang iyang amahan ug inahan. Ang iyang amahan atoa sa Catmon nga nagsige lang kuno og inom.

Wala pod siya mangawat og wiring sa maong taytayan sukwahi sa akusasyon sa kapulisan. Ambot bunga ba lang kaha kini sa iyang pagka-praning gumikan kay mi-angkon man siya nga naghingos siya og rugby kaniadto. Kutob lamang siya sa second year high school. O ba kaha napasmo lang intawon siya kay iya mang gibaktas ang Catmon pa-ingon sa dakbayan sa Lapu-Lapu sa wala pa siya mokatkat sa taytayan.

PASAYLOON

Alang kanako dili na lang unta kini siya daginuton sa atong kapulisan. Ang buot nakong ipasabot nga dili na lang siya ikiha kay dili man usab dako nga danyos ang iyang nahimo. Namutol lang siya og mga wirings sa taas. Kanang alarm and scandal, theft ug illegal possession of bladed instrument gumikan sa iyang pagdala og sundang wala may napurwesyo ug complainant. Luoy sab baya kaayo.

Angayan man gani nato kini siyang tabangan kon unsa may atong ikatabang. Kon aduna siyay deperensiya sa pangisip dan atong ipahiling sa mga batid nga doktor aron ato siyang matabangan nga mabalik ang iyang normal nga pangisip. Kaloy-i na lang na intawon siya ninyo S/Supt. Anthony Obenza, Sir. Plitihan ko man gani na siya sa barko kon modayon siyag adto sa Bukidnon aron makita niya iyang inahan. Kon masuta nga adunay deperensiya ang pangisip dili man gihapon nato na siya makiha. (bobby@sunstar.com.ph)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph