Nalzaro: Sayang ka Gwapa
ATO na lang siyang tawgon nga ‘Ms. J’ gumikan kay nasuta man gyud nga usa siya ka menor de edad. Dise sayes anyos pa gyud siya. Siya ang babaye nga gitumbok sa mga tigbalita mga ‘beautiful shoplifter’ o guapa nga mangingilad. Kini gumikan kay daghan na siyang gipang-ilad. Wala ako makakita ni Ms. J sa personal apan kon atong basihan ang iyang mga hulagway nga napatik sa mga lokal nga pamantalaan ug mikatap sa social networking site, maanyag ug makabibihag gyud siya. Mamords o hubag kaayo. Kon taga Dumaguete pay pasultihon ‘patsada’.
Sa mga lalake si kinsa ba gyud tang dili madala sa iyang kaanyag. Bisan ako. Dili man siguro sala kanang ma-ibog ka og usa ka maanyag. Gihatagan man kita og mga mata sa Ginoo aron makamao kitang maka-appreciate kon unsa ang beauty. Di ba? Duna man gani koy mga higala nga andam magpa-ilad ni Ms. J. Dunay gustong mobayad sa iyang obligasyon niadtong beach resort nga iyang gi-estaran nga wala niya mabayri. Adunay gustong motanyag og piyansa aron siya makagawas. Ingon ana ang ilang simpatiya kang Ms. J dili kay menor de edad siya apan gumikan sa iyang kaanyag.
WA MAGTUBO
Ang unang atraso o hinungdan nga migawas ang iyang pangalan sa media mao kadtong iyang pagpanguha og mga senina sa usa ka botique sa usa ka mall sa Mandaue. Ikaduha, mao ang wala niya pagbayad sa beauty parlor diin siya nagpagwapa ug ang bag-o ang pag-estar niya sa beach resort sa Asturias. Kana lang ang na-report sa media.
Matod pa ni Southern Leyte Provincial Board Member Daisy Gamale, kabanay ni Ms. J, nga wala magtubo ang dalagita sa iyang mga ginikanan. Ang iyang apelyedo nga gidala, apelyedo sa nahimong bana sa iyang inahan apan dili niya amahan. Buot ipasabot nga nagbuntis ang iyang inahan sa laing lalake nga mao ang iyang tinud-anay nga amahan sa dihang gikasal sa iyang ama-ama. Salvador del mundo lang ang gi-ila niyang amahan. Adunay mga igsuon si Ms. J, sa inahan sa laing mga amahan. Matod ni board Member Gamale sa akong pagpakighinabi kaniya sa atong tulumanon sa DYSS Super Radyo, didto magdako si Ms. J sa iyang mga paryente sa Sogod, Southern Leyte kay gibiyaan na siya sa iyang inahan sa dihang singko anyos pa siya. Second year high school lang ang iyang naabot kay naglayas-layas na siya. Gidala siya sa iyang inahan sa kaulohan apan milayas gihapon.
MAGREPORMA
Matod ni PB Gamale posibleng kulang lang sa tender, love and care si Ms. J gumikan kay walay ginikanan nga nag-atiman kaniya. Apan wala man usab siya pasagdi sa mga mimatuto kaniya. Gihatagan siya og importansiya. Wala man usab kunoy sakit si Ms. J nga kleptomania. Gustong lang siguro siya nga anaa sa limelight gumikan lagi sa iyang kaanyag. Ambot kon madala pa ba kaha si Ms. J og rehab ug magbag-o na. Kay kon dili siya ma-usab masayang ang iyang kaugma-on. Sayang ka gwapa. Dili nato dayon siya i-kondinar inay ato siyang tabangan nga magbag-o.
(Bobby.nalzaro@yahoo.com.)