Nalzaro: Suweldo sa bus drivers

MIPAGAWAS og kamanduan ang Land Transportation Franchising and Regulatory Board (LTFRB) nga nagmando sa mga bus ope­rators sa pagahatag og fixed nga suweldo sa mga bus drivers. Ang maong kamanduan, gipagawas sa LTFRB human kini makigpirma og memorandum of aggrement tali sa Department of Labor and Employment (Dole) ug sa Metro Manila Deve­lopment Authority (MMDA). Kon unsa man ang minimum wage sa usa ka rehiyon mao ang sundon sa mga bus ope­rators. Unya sama sa ubang mga empliyado moserbisyo lang usab ang mga drivers sulod sa walo ka oras.

Ang Sugboanong LTFRB Commissioner nga si Manuel Iway mao ang nangusog aron matigayon kining maong kamanduan. Si Iway misuporta kini sa kawsa sa mga pasahero. Kay sa dihang wala pa siya matudlo isip commissioner sa LTFRB, siya maoy kanunay nga mangusog sa pagsupak kon adunay petisyon ang mga bus ug jeepney operators nga mopa-usbaw sa plitihan. Siya ang kanhi regional director sa Land Transportation Office (LTO 7) niadtong dekada 90.

MAS MAKAAYO

Ang Ceres Bus Line nga maoy nag-monopolize sa bus transportation dinhi sa Kabisay-an misagop na ning maong matang sa sistema sa ilang mga dri­vers. Adunay fixed salary ang ilang mga drivers. Unya aduna pa gyud incentive niadtong makapasakay og daghang mga pasahero. Busa kong nahimo kini sa tagdumala sa Ceres Bus Line, walay rason nga dili kini mahimo sa ubang operators. Human migawas ang maong kamanduan, mipadayag sa ilang kusganong pagsupak ang mga bus operators.

Matod sa mga operators nga dili kini applicable kanila kay ang mga drivers dugay kaayong maghuwat sa mga pasaheros. Moabot gikan sa duha ka oras ngadto sa tulo ka oras nga maghuwat ang mga dri­vers sa mga pasahero, sa dili mapuno og usa molarga. Nganong nahimo man lagi kini sa taga Ceres? Dili ba matag oras man ang schedule sa pagbiya sa matag bus? Kini usab nga pamaagi, malayo sa disgrasya ang mga drivers. Kay human sa walo ka oras nilang pagmaniho, makapahuway naman sila dayon. Kana kon dili mag-overtime. Kasagaran sa mga disgrasya gumikan kay ang mga drivers nakatulog samtang nagmaniho gumikan sa kalapoy sa lawas tungod sa kataas sa oras sa pag-drive.

TAXI DRIVERS

Pwede pod nga sagupon kini sa mga taxi operators ug mga drivers. Pero gikinahanglan nga hatagan og kota ang mga drivers kon pila ang iyang i-remit ngadto sa operators.

Karon god, boundery man ang pamaagi. Usa kalibo ang abang sa sakyanan labi pa kon bag-o ang unit. Unya full tank inig uli. Siguro mao ra gihapon ang pro­seso nga sundon.

Gikinahanglan nga hatagan og kota. Wala nay take home pay ang driver matag adlaw kay magdawatan naman og suweldo matag kinsinas. Kay kon dili nimo hatagan og kota ang driver, dili na mamasada. Matulog na adto sa punuan sa acacia nga puwer­ting bugnawa.

O ba baka magsugal na og chikitsa. Ang kuyaw ani og apil ang mga trisikol drivers modemanda na usab og monthly fixed salary.(bobby.nalzaro@yahoo.com)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph