NAKUGANG ang police jailer human dunay siyagit sa usa ka bata.
Dihang ilang gisusi ang ilang pinirisong babaye, nanganak diay kini kagahapon sa alas 9 sa buntag sulod sa Danao City Police Station.
Si Roselyn Ruta, 18, dunay kapuyo, taga Barangay Looc, nasikop niadtong Martes human nalutsan og warrant of arrest sa kasong grave threat and malicious mischief.
Si Insp. Romeo Caacoy, deputy police chief sa Danao City, nga nahinabi sa dySS Super Rdyo Sun.Star Superbalita nipadayag nga nakurat sila.
“Wala man sab gud ni siya magsulti. Unya gamay sab kaayo og tiyan. Dili sab nato mailhan ba,” dugang ni Caacoy.
Matod niya nga si Ruta nananghid kang PO1 Doniel Capuyan, on-duty jailer, nga mogawas siya kay moadto sa comfort room.
Pipila ka minutos nakadungog siyag siyagit o hilak sa usa ka masuso.
Gidali nila si Ruta sa pagdala ngadto sa Cebu Provincial Hospital sa may Barangay Poblacion.
Wala maglangay gibalhin gilayon nila ngadto sa Vicente Sotto Memorial Medical Center (VSMMC).
Gibutyag ni Caacoy nga gisikop nila si Ruta, niadtong Martes pinsikad sa warrant of arrest nga gi-isyu ni Municipal Trial Court Judge Maria Josefa Ramos sa korte sa dakbayan sa Danao.
Sumala niya nga ang bata premature kay pito pa lang ka buwan apan maayo na ang kahimtang niini.
