Napildi apan nakakombati

SAMA sa gituohan, milampos ang mas tag-as nga Greece batok sa Gilas Pilipinas apan wala damha nga nakasukol og sakto ang mga Pinoy una kini nasugamak sa 70-82 nga kapildihan kagahapon sa usa ka duwa nga namansahan og kagubot sa tumoy sa 2014 FIBA World Cup sa Seville, Spain.

Ang world no.5 ranked Greece, nga mao na’y nag-una sa Group B dala ang 2-0 nga rekord, gipangulohan ni Georgios Printezis pinaagi sa iyang 25.

Naangkon man tuod sa Gilas ang ikaduha nilang sunodsunod nga kapildihan apan nagpabiling taas ang garbo sa mga Pinoy gumikan kay napamatud-an niini nga angayan lang silang makataak og balik sa world stage. Kini maoy labing unang higayon nga nakabalik ang Pilipinas ning matag upat ka mga tuig nga torneyo gikan niadtong 1978.

Sa premirong duwa sa Gilas, napuno gihapon sila sa pagdayeg bisan napilde sila sa Croatia, 78-81, pinaagi sa overtime.

Batok sa Greece, napakita na sab sa Gilas ang kalig-on a sa ilang kasingkasing bisan sa kamatuoran nga lupig kaayo sila sa tapad. Hasta ang naturalized player sa Gilas nga si Andray Blatche nigamit sab og kasingkasing ug nikmbati gihapon kini’g sakto bisan adunay higayon nga magtakiang na kini gumikan sa angol sa iyang tuhod.

“If you told me before the start of the tournament that we would be able to stick with the No. 5 in the world in the Greek squad, I would’ve been very happy with that,” asoy ni Gilas coach Chot Reyes sa interbyu sa Spin.ph.

“I’m crushed by the loss but I’m still very happy with the effort of my players.”

Si Blatche, kinsa kanhi magduduwa sa Brooklyn Nets ug kasamtangang free agent sa National Basketball Association (NBA), maoy nangulo sa Gilas pinaagi sa iyang 21 puntos ug 14 rebounds.

Ang Subuanong higante nga si 6’10” Junemar Fajardo niamot og 10 puntos ug pito ka rebounds alang sa Gilas.

Pagkahuman sa duwa, kalit lang niulbo ang kasamok dihang nagkabangi ang 7’1” nga higante sa Greece nga si Giannis Bourousis ug ang pointguard sa Gilas nga si LA Tenorio.

Nagkalalis ang duha kabahin sa pag-itsa og three-point shot sa Greece sa dayong pagkapupos sa oras nga unta miisa na man sa ilang bandera ang Gilas ug wala na kini modepensa.

Nisamot kainit ang panaglalis dihang giakusahan sa Greece ang Gilas nga hugaw og dinuwaan. Hinuon napugngan ra ang kasamok.

Puntos matag usa:

Greece (82) - Printezis 25, Bourrousis 12, Calathes 9, Papanikolaou 9, Zisis 8, Vasileiadis 6, Kaikakoglou 5, Antetokounmpo 3, Vougioukas 2

Gilas Pilipinas (70) - Blatche 21, Fajardo 10, Pingris 7, Castro 5, Lee 5, Norwood 5, De Ocampo 4, Chan 3, Tenorio 3, Alapag 3, Aguilar 2, David 2 Quarterscores: 20-10; 37-27; 58-48; 82-70.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph