PULOS negatibo sa typhoid fever ang 19 ka mga pasyente nga nalandig sa Tuburan District Hospital nga gipanghilantan pipila na ka adlaw ug nagpakita og samang simtomas sa naasoyng sakit.
Si Shalimar Lucmayon, nurse-on-duty sa ospital, nibutyag nga base sa gipahigayon nga typhi dot test sa mga pasyente, pulos sila negatibo sa typhoid fever.
Ang typhi dot test usa ka eksaminasyon sa dugo nga nagsuta kon aduna bay presensiya sa salmonella typhi, ang kagaw nga hinungdan sa tipos.
Si Lucmayon nagkanayon ang upat ka mga molupyo nga nagpositibo sa typhoid fever, nagpanuigon og kwatro, 11, 13 ug usa ka hamtong, ang wala mahilandig sa ilang tambalanan.
“Wa na sila diri ma-admit,” nagkanayon ang nars sa pakighinabi sa Sun.Star Superbalita kagahapon.
Alas 5:00 kagahapon sa hapon, matod ni Lucmayon, tulo na lang gikan sa 19 ka mga pasyente, ang nahabilin sa ospital ug padayon nga gi-monitor apan layo na sa makuyaw nga kahimtang.
Ang nahabilin mao ang magsuong 9 ug 16 anyos ug usa ka 22-anyos nga babaye.
“Maayo na sila but they opted to stay,” dugang pa niya.
Si Tuburan Mayor Democrito Diamante niingon nga abagahon sa lungsod ang tanang bayranan sa ospital sa mga pasyente.
Ang mga pasyente ug mga residente sa Barangay Montealegre, matod sa mayor, ang gipanghatagag mga tambal, bugas, noodles, de lata nga pagkaon ug binotelya nga tubig nga adunay chlorine.