Negusiyante gitulis, kidnapon sab unta

USA ka inilang negusiyante ang diriyot mahug sa kamot sa mga kidnaper sa alas 3:30 sa hapon niadtong Huwebes didto sa probinsiya sa Cotabato.

Gibutyag ni Cotabato Police Provincial Director Cornelio Salinas nga upat ka wala mailhing mga armadong lalaki ang kalit nga misulod sa FMC Hardware sa Barangay Poblacion 6, Midsayap sa maong probinsiya ug nagdeklara og tulis.

Sa dihang gamay ra ang kuwarta nga nakuha, ilang gipangita ang tag-iya sa hardware nga si Frank Chong.

Apan nakadagan na ang negusiyante nga milusot sa likod nga bahin sa tindahan.

Gipabuthan sab sa mga guwardiya sa tindahan ang mga suspek. Mga pulis sa Midsayap nga gipangulohan ni Chief Inspector Elden Magbanua miresponde dayon human nakadungog og mga buto sa armas. Apan abtik ang mga suspek kinsa dali nga misibat sakay sa usa ka L300 van.

Milusad gilayon og follow-up operation ang hiniusang puwersa sa 40th Infantry Battalion sa Philippine Army ug Midsayap PNP batok sa mga suspetsado.

Pipila ka oras ang milabay narekober sa mga otoridad ang usa ka L300 van nga dunay plakang TSE 524 didto sa Barangay Polumoguen, Midsayap nga utlanan sa Nothern Kabuntalan, Maguindanao Province, nga maoy gisakyan sa mga suspek.

Gikompirma sab ni 6th ID Chief Major General Antonio Alcantara nga grupo ni Kumander Lastikman sa Moro Islamic Liberation Front (MILF) Lost Command ang mga armado nga modagit unta sa negusiyante. (Edgardo Fuerzas)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph