TAGUM CITY -- Mokabat ngadto sa P715 mil nga salapi ug kantidad sa kabtangan ang natangag gikan sa usa ka negusiyante human gitulis sa lima ka tulisan alas 9 sa gabii niadtong Huwebes.
Subay sa taho gikan sa Tagum City Police Station (TCPS), nasayran nga lima ka armadong tulisan ang kalit nga misulod sa balay ni Carmen Tamayo, 40, molupyo sa Purok Sampaguita, Seminary Drive, Barangay Magugpo West, Tagum City, uban sa iyang mga kabanay samtang nagtan-aw og telebisyon.
Ang mga tulisan mideklara dayon og tulis ug tungod sa kahadlok, gipasagdan na lang ni Tamayo ang mga suspetsado nga manglimas sa iyang mga kabtangan ug salapi.
Natangag sa mga tulisan ang mga alahas nga nagkantidad og tunga sa milyon ka pesos, mga bulawan nga gibana-bana nga mobalor og P100 mil, selpon nga tag-P15 mil ug salapi nga P100 mil.
Human makuha sa mga tulisan ang ilang tuyo, dali silang mikabayo sa ilang tagsa-tagsa ka mga motorsiklo ug dayong sibat sa wala matinong direksiyon.
Daling gipatala ni Tamayo ang hitabo ngadto sa kapulisan TCPS ug naglaum nga mabalik pa ang natulis niyang kabtangan ug salapi ngadto kaniya. (Teddy Cabana)