NASIKOP sa mga operatiba sa National Bureau of Investigation (NBI) 7 sa usa ka buy bust operation ang usa ka Nigerian national nga giingong namaligya og binulto nga gidudahang shabu.
Nakuha gikan sa suspek nga si James Cunta Okwudili Uyanneh ang 70 gramos nga giingong shabu nga dunay street value nga P350,000.
Nadakpan si Uyanneh pasado alas 9 niadtong Martes sa gabii sa Moonlight Lodging Inn sa Dakbayan sa Mandaue, diin usab giingong nahitabo ang binayranay alang unta sa gi-order nga shabu.
Matod ni NBI7 Director Atty. Antonio Pagatpat nga gitago sa langyaw sa usa ka cardboard ng giputos usab og shower curtain ang shabu nga maoy iya untang ibaligya sa nagpakaaron ingnon nga buyer.
Upat ka buwan nga gisundan sa NBI7 ang illegal nga kalihukan ni Uyanneh.
Base sa ilang mga nahipos nga kasayuran, mangunay ang langyaw sa pagpamaligya og shabu ngadto sa iyang mga suki.
Apan ang suspek nanghimakak niini.
Siya niingon nga usa siya ka negosyante ug nanag-iya sa kompaniyang Eco Pacific Global Links nga rehistrado sa Securities and Exchange Commission.
Ang kompaniya gitumbok ni Uyanneh nga mo-import og krudo apan iyang giangkon nga wa pa sila makabuelo dinhi sa Pilipinas tungod kay wa pa siya’y buyer.
Dugang niya nga sakop siya sa Cebu Chamber of Commerce and Industry.
Dihang gihinabi sa mga sakop sa media, lihay ang mga tubag niini kon pangutan-on kalabot sa iyang pamilya ug sa lugar diin siya nanimuyo.
Ang agent on case, Atty. Bernard dela Cruz, niingon nga nakapuyo sa Banawa ug Guadalupe si Uyanneh apan dihang gisusi nila ang address nga gitug-an niini, dugay na diay siyang wa sa maong dapit, lakip na ang iyang pamilya.
Giingong naminyo og usa ka Pinay si Uyanneh niadtong 2007.
Gisusi sa NBI kon sakop ba sa usa ka drug syndicate ang suspek ilabi na usab kay sa miaging duha ka tuig, duna’y Kenyan national nga usa sab ka drug courier ang nasikop sa NBI.
Kasong kalapasan sa Sec 5 sa RA9165 kun pagpamaligya og illegal nga drugas ang isapaka sa NBI batok ni Uyanneh.
Awhag sa NBI ngadto sa mga dunay nahibaw-an sa illegal nga kalihukan sa suspek sa pagpakig-alayon sa ilang buhatan aron mahibawa-an usab kon kinsa ang mga kakunsabo niini.
Makig-alayon ang NBI7 ngadto sa Bureau of Immigration (BI) aron mahibaw-an ang tinuod nga pagkatawo sa suspek.
Kini tungod kay limitado ang mga impormasyon nga gihatag niini labot sa iyang kaugalingon hinungdan nga mangayo sila og dugang impormasyon sa BI labot kaniya.
Hatagan usab nila og kopya ang BI sa kasong gikalambigitan ni Uyanneh, particular na ang iyang pagkasikop.
Pahibaw-on usab sa NBI7 ang embahada sa Nigeria labot sa gidangatan sa ilang national. (Astra Zina D. Logarta)