WAY parokyano’ng ganaha’g pari nga sige’g muro. Way parokyano’ng ganaha’g kura nga di mokatawa. Ikaw kuno, makatabang ba sa imong pag-ampo ang pari’ng sige’g kasuko?
Niadtong Hulyo 6, sa usa ka tigum sa Vatican, gimaymayan ni Pope Francis ang mga seminarista, pari ug madre nga sobra ka-seryoso sa ilang pagserbisyo sa simbahan.
Iyang gilabay iyang maymay nila nga mura’g nalimot na sa pagkatawa o bisan sa pagngisi naman lang intawon diha sa ilang apostolado.
Sa mga balita nga nanggawas human sa tigum, kining maymay sa Santo Papa nalubong sa lain niyang pahimangno sa mga madre’g pari sa pagpuyo og yano nga kinabuhi. Sa samang panagtapok, giawhag ni Pope Francis ang mga kaparian ug kamadrehan sa di paggamit og mga luhong sakyanan ug mahalong butang.
Apan di kini bag-o. Ang mga Santo Papa sukad pa sa una nag-awhag sa mga kaparian ug katawhan sa pagpuyo nga yano. Ang mas bag-o mao ang awhag sa Santo Papa nga unta ang atong mga pari ug madre mo-smile pud panagsa.
Matud pa sa Santo Papa, daghang pari ug madre nga “too serious, too sad (sobra ka-seryoso, sobra ka-magul-anon).” Ug iya kining gisumpayan, “Something’s not right here… There is no sadness in holiness (Way kagul-anan diha sa pagkasantos).”
Ug kon nagtuo ta nga nagpasiaw lang ang Santo Papa, dia pay iyang giingon: “If you find a seminarian, priest, nun, with a long, sad face, if it seems as if in their life someone threw a wet blanket over them… it’s a psychiatric problem. They can leave.”
Kon seminarista, pari o madre kuno ka nga magul-anon ug nagmugtok lang ang nawong, gawas na lang kay may problema ka sa utok. Ug kon tua na ka sa gawas, ayaw’g gamit og habol nga basa kay makabuang na.
Bitaw, abi kay nangandoy ta’g kasantosan sa kinabuhi, pinakusmod diay ang simud? Kay ngano? Di ba diay masantos ang mga hingatawa ug gwatsinanggo? Di ba pahiyum man ang dagway sa langit?
Ambot diin dapita sa kasaysayan sa simbahan nagsugod ang paghulagway sa mga santos ug relihiyoso isip mga tawong sobra ka-seryoso ug daw way kalipay. Tinuod lawom ang kasinatian sa simbahan isip linutos ug dinaugdaug. Apan di ba lawom man sab ang iyang kasinatian isip usa ka-madaugon nga katawhan?
Mao ni giingon sa Santo Papa sa iyang pakigpulong nga “the joy of the Lord.”
Taas-taas sab ang katuigan nga ako nag-alagad sa simbahan isip seminarista, ug tinuod ang giingon sa Santo Papa nga daghan sa atong kaparian ang masulob-on sa ilang pagserbisyo sa katawhan.
Ug kon unsa kalawom ang ilang kaguol, ingon usab niana ang kamabaw sa kalipay nga ilang gipangita diha sa mga mahalong sakyanan ug mga luhong butang.
Padre, wacky pose sab panagsa.
(@insoymada on Twitter)
